Le temps

Ou vive le présent ki continué vine le passé à chaque fraction seconde en attendant le futur ki pas pou tardé pou vine joine ou et li pou fini aussi.

Personne pas capave rattrape ene le temps ki fine fini traversé quand même li capave fine fecque traversé avant ene seconde. Dans ça sens là ene le temps ki fine traversé, li vine bien loin avec ene dimoune. Et ene le temps ki pencore vini, li ene kitchose bien près dans le sens ki li pas pou tardé pou vini.

Donc ene dimoune li vive entre ene le temps ki pé approché avec li à chaque instant et ene l’autre ki pé éloigné avec li à chaque fraction seconde. Le temps ki li pé vive, c’est le présent. Si ene dimoune oulé profité pleinement avec so la vie, li bizin vive so présent avec boucou précaution et boucou vigilance. Li bizin pas laisse le temps perdi. Et faudré pas li faire ça erreur néglige le présent dans l’espoir pou répare li dans le futur parceki le futur li toujours dans balance et personne pena aukene garantie. Dans ça façon-là ene dimoune pou perdi tout. Pé perdi zordi dans l’espoir demain sans conné ki pou réussi trouve demain ou bien non. Et ki conné ki la personne capave pena l’énergie et courage pou faire li si li fine ena la chance trouve ça demain-là. Ene dimoune ki perdi so le temps, li regretté pou tout le temps. Donc nou bizin pas laisse nou vine dans ene situation pareille. Dimoune dire "Time is gold" mais nou conné ki ene "gold" perdu capave regagne li. Mais le temps perdu pas capave regagné. Dans ça sens-là nou bizin dire "Time is more precious than silver, gold and even diamond".

Ene dimoune li prend boucou précaution et li prend banne mesures nécessaire pou sécurité so du bien. Le temps li mérite plis l’attention encore. Ene dimoune bizin pas laisse so le temps alle dans vide parceki en faisant cela li pé perdi so la vie même et li pé perdi ene kitchose ki pli valeureux ki so banne du bien. Mais li malheureux et bien malheureux même pou constaté ki dimoune pé perdi et gaspille ene faveur aussi valeureux sans pitié et sans regret. Li perdi so l’enfance dans joué, so jeunesse dans divertir et so vieillesse dans l’incapacité et l’insouciance. Pou attire nou l’attention vers ça même genre de négligence ki Nabi ‎(Sallallaahou A'laihi Wasallam)‎ fine dire :

"Ena deux faveurs ki boucou dimoune faire défaite là-dans : la santé et le temps libre."

C'est-à-dire dimoune pas conne gère et profité avec ça deux cadeau-là. Li fini so la santé et so le temps dans faire banne kitchose ki nuire so la vie et la vie so famille. Et ceki pli grave encore c’est so akhirat ki souffert. Dans gaspille le temps, ene dimoune vine ene gros perdant dans dounia et dans akhirat pou tout le temps. Ki ene dimoune li attane pou gagné dans passe banne nuits blanche dans faire gamate, chanté dansé joué ou bien dans promené ? Pena narien apart l’échec. Pena narien apart ruine la vie. Pena narien apart faire ou même souffert. Par contre si fine passe ça banne moments-là dans zikrullah, tilawatul Qour’aan, namaz etc, ça pou amène noor (lumière) dans so le cœur, dans la vie ici et là bas. Donne ça le temps-là à celui ki fine donne ou li. Donne ou la vie à celui ki fine donne ou la vie. Ça même ki pou servi ou et ça même ki pou utile et profitable.

[Extrait de Al Jamiat Vol.5 No.3]