Le model parfait

Ou fine donne ene contracteur ene plan construction. Ou attane ki li construire ou la caze d’après plan ki ou fine donne li. Mais si jamais contracteur-là li faire la caze-là d’après ene l’autre plan, eski ou pou d’accord pou paye li ? Eski ou pou satisfait avec ceki li fine faire ? Définitivement ça pas pou faire ou plaisir et ou pas pou accepté pou paye li. Ou capave poursuive li tout. Et pas bizin dire couma ou pou en colère si coiffeur fine gâte ou cheveux ou bien tailleur ou modiste fine gâte ou linge. Et surtout quand ou ena pou alle dans kit invitation bien important.

C’est ça même erreur et ça même gaffe ki nou pé faire avec nou la vie. Allah Ta’ala fine donne nou la vie et fine envoye nou ene model parfait en la personne de nou bien-aimé Nabi ‎(Sallallaahou A'laihi Wasallam)‎. Astere nou ena pou amène nou la vie d’après ça joli model ki Allah Ta’ala fine accorde nou. Mais zéro plombage ! Nou la vie pas pé corresponne ditou avec ça model-là. Nou la tête, nou figure, nou l’habillement et nou tenue pas ressemblé ditou avec ça model-là. Nou pé faire avec nou la vie ceki contracteur fine faire avec nou la caze et couma tailleur ou modiste fine faire avec nou linge. Nou pé vive dans ene façon couma dire nou fine faire serment pou pas suive ça model-là.

Allahou Akbar ! Malgré tout ça-là Allah Ta’ala pé encore donne nou, nou banne nécessités. Li pas pé prive nou de ça l’air ki nou pé respiré-là. Ki quantité bon Allah Ta’ala été ! Ki quantité pitié Allah Ta’ala ena ! Eski là-aussi nou pas pou montré nou reconnaissant envers nou Rabb ? Là-aussi nou pas pense pou suive ça model parfait-là ?

L’apparence montré ki nou pas conne le bien être réel. Nou pas conne le véritable succès et le succès complète. Nou concept de succès et du bien être li ene conception matérialiste ki restreint à ça la vie mondaine ki nou pé vive-là. Mais après ça la vie-là aussi ena ene l’autre la vie ki paraite nou fine oublié li complètement. Aussi longtemps ki nou pas pense à propos succès ça l’autre la vie-là, nou succès dans ça le monde-là li pas pou ene succès complète. Ene succès li vine ene succès quand li pas transforme en échec finalement. Donc sans succès dans aakhirat, tout succès dans ça le monde-là li ene échec.

Succès dans aakhirat li dépanne lors Imaan et suive le model parfait de Nabi ‎(Sallallaahou A'laihi Wasallam)‎. Donc pena véritable succès sans Imaan et sans suive le model parfait de Nabi ‎(Sallallaahou A'laihi Wasallam)‎.

[Extrait de Al Jamiat Vol.5 No.3]