Nou Rabb sufi pou nou

Ene bon dimoune jamais li pou désapprouve ene bon kitchose. Li pou toujours ena l’appréciation pou ene dimoune ki pé pratique ene bon kitchose.

Ena ene l’autre catégorie ki pas ça pratiquant-là mais sanla aussi li montré certaine appréciation quand li trouve kikene pé faire ene bon travail. So négligence dans Deen pas empêche li apprécié banne pratiques de Deen.

Ena ene troisième catégorie ki non seulement li pas pratiquant, mais li désapprouve tout ceki ou faire. Ni li faire ni li oulé so camarade faire li. Par exemple li trouve ene madame ki fine mette so pardah. Alors li même li pas faire li et ni li trouve bon ceki ça madame-là fine ena la volonté faire. Pas fini ! Li alle ziska même critique ça tenue ki Allah Ta’ala fine ordonne banne madames pou adopté li. Bizin faire bien attention ! Ene l’attitude semblable capave enlève ça ti dernier étincelle de Imaan ki nou capave encore ena dans nou le cœur. Sans doute ça dounia-là personne pas fine amené avec li. Nou aussi nou pou quitte tout la même. Et après la mort nou risqué perdi nou aakhirat aussi. Pena dimoune pli malheureux ki ça. Ki Allah Ta’ala protége nou tou !

Donc faudré pas nou hésité pou mette ene bon pratique diboute quand nou trouve personne pas pé faire li. Forcé-forcé ene ti groupe ki capave pas trouve ça bon. Ki faire nou bizin quitte ene bon kitchose acoze ene ti groupe ki pas bon. Pourvu nou Rabb li satisfait avec nou. Et ça même sufi pou nou.

[Extrait de Al Jamiat Vol.5 No.3]