Pli précieux ki l’or

Nabi ‎(Sallallaahou A'laihi Wasallam)‎ ti empêche ene certaine façon loué la terre. Ene Sahabi fine comprend ki loué la terre en li même li empêché en général. So la famille ti pé faire ça transaction loué la terre-là. Li vine cotte zotte pou informe zotte ki Nabi ‎(Sallallaahou A'laihi Wasallam)‎ fine empêche loué la terre. Li faire ressortir ki ena boucou profit dans ça transaction-là mais suive Nabi ‎(Sallallaahou A'laihi Wasallam)‎ li pli profitable et pli valeureux. Ça c’était l’état d’esprit banne Sahaba-e-Kiraam ki zotte pas ti pé considère narien divant l’ordre et l’enseignement Nabi ‎(Sallallaahou A'laihi Wasallam)‎.

Coumsa même ene fois Nabi ‎(Sallallaahou A'laihi Wasallam)‎ fine trouve ene bague en l’or dans le doigt ene Sahabi. Alors Nabi ‎(Sallallaahou A'laihi Wasallam)‎ fine tire li depi dans le doigt ça Sahabi-là et fine jette li. Quand Nabi ‎(Sallallaahou A'laihi Wasallam)‎ fine fini allé, lezot banne Sahaba-e-Kiraam fine conseille ça Sahabi-là pou li ramasse li ki li capave bénéficié avec ça dans ene l’autre façon. Mais ça Sahabi-là fine refuse ramasse ça en disant ki ene kitchose ki Nabi ‎(Sallallaahou A'laihi Wasallam)‎ fine jette li, couma mo capave permette moi ramasse li. Ça veut dire ki pou ça Sahabi-là l’ordre Nabi ‎(Sallallaahou A'laihi Wasallam)‎ ti pli précieux et pli valeureux ki l’or. Et en général banne Sahaba-e-Kiraam pas ti pé laisse narien surpasse l’ordre Nabi ‎(Sallallaahou A'laihi Wasallam)‎. C’est là-dans même ki trouve secret de zotte succès et zotte progrès. Ça moyen de succès-là li pas restreint à l’époque Sahaba-e-Kiraam. Li ouvert pou l’humanité entier ziska Qiyaamat. L’avenir musulman li paraite bien sombre. Pena aukene solution apart ki nou donne banne principes et l’enseignement de Nabi ‎(Sallallaahou A'laihi Wasallam)‎ zotte l’importance ki zotte mérité. Musulman bizin pas attane progrès si zotte pas près pou attrape sounnat Nabi ‎(Sallallaahou A'laihi Wasallam)‎. Faudré pas nou attane progrès zisse acoze ki nou porte nom musulman et nou pratique ene deux kitchose de l’islam occasionnellement. Zordi jour nou la vie de 24 hrs li d’après principe lezot. Nou raisonnement li pas ene raisonnement islamique. Nou ena ene vision purement matérialiste. Après tout ça-là nou ena toupé dire ki fer nou pé être piétiné à tout niveau. Quand Qour’aan-e-Kareem fine promette nou le succès, nou bizin conné ki Allah Ta’ala so parole li vrai. Pena doute là-dans. Mais bizin satisfaire certaine conditions pou gagne ceki li fine promette. Et normalement ça li applique pou ene l’Islam complet. Donc nou pas capave attane ça avec autant négligence dans Deen. Li facile pou comprend ki ça dose de Deen ki nou pé prend-là li trop faible pou ça grand succès ki nou pé atane-là.

[Extrait de Al Jamiat Vol.5 No.4]