Vrai beauté

Véritable beauté c’est la beauté ki pou faire ou paraite joli dans aakhirat. Et ça li pas dépanne lors joli l’apparence. Faudré ena taqwa dans ene dimoune. Sans quoi ena toute chance so beauté l’extérieur vine ene fardeau.

Avec taqwa, ene dimoune li paraite joli dans dounia aussi quand même li pena ene joli l’apparence et Allah Ta’ala pou faire li paraite pli joli dans aakhirat. Par contre ene dimoune ki ena ene joli teint mais ki pena Deen dans li, ça li bien dangereux. Faudré pas gagne embêté si ou trouve ene quantité pé intéressé avec ou. Ou ti pou ena droit être fier et satisfait si ou jeunesse et ou beauté ti ene kitchose ki pas abîmé jamais. Mais ferraille aussi li pourri. Après deux jours ou alle guette li dans qabar, ou pou trouve la vérité. Et si ou alle guette li après ene deux ans, ou rodé même ou pas pou trouve li. Et ceki pou divant ou lizié, ou pas pou oulé guetté. Et pourtant ça même ti faire ou vine fou. Heureux c’est ça banne jeunes ki fine donne zotte jeunesse et zotte charme dans chemin Allah Ta’ala. C’est banne ki Allah Ta’ala fine promette zotte pou donne zotte place enbas so Trône jour Qiyaamat.

[Extrait de Al Jamiat Vol.5 No.4]