Vine pou Allah Ta’ala

Ou bizin vine pou kikene ki capave aide ou partout et dans tout circonstance. Ene kikene ki narien pas capave empêche li aide ou si li oulé aidé. Ene kikene ki ena capacité aide ou. Ene kikene ki surpasse tout kitchose. Ene kikene ki conne tout, ena capacité faire tout et capave aide ou partout et capave repone ou l’appel dans tout situation. Ki sanla ça kikene-là ?

C’est Allah Ta’ala. Acoze ça nou bizin vine pou Allah Ta’ala si vraiment nou content nou bien être. Dimoune ki tourne le dos avec Allah Ta’ala, li faire li même ditort et li pas sincère envers li même et pourtant li capave pé pretanne être sincère envers l’humanité. Li difficile pou compte lors kikene ki pas sincère envers li même. Acoze sa celui ki pas fine vine pou Allah Ta’ala, li pas capave vine pou kikene.

Pena narien pli cher pou ene mama papa ki so zenfant. Coumsa même ene zenfant aussi li ena bien l’amitié avec so parent. Mais d’après Qour’aan-e-Kareem, jour qiyaamat personne na pas pou conne personne. Chakene pou guette pou li. Et chakene pou conne pou li. "Et quand ça l’événement casse zoreille-là pou vini, c’est ene jour quand ene dimoune pou tourne le dos de so frère, so mama, so papa, so madame et so banne zenfants. Chaque dimoune pou ena ene problème ça jour-là ki pou ranne li insensible (de lezot)" (V33-37/ S80)

Chaque dimoune pou ena so tracas. Et chaque dimoune pou inquiet apropos so sort. Personne pas pou capave aide personne. Au contraire si kikene ti pou ena capacité, li ti pou voudrait donne so banne zenfants, so madame, so frère, so la famille et tout ceki lors la terre comme rançon zisse pou sauve so la peau. Mais ça li pas pou possible parceki personne pas pou capave sauve personne.

Ça pas veut dire ki nou bizin pena l’amitié pou kikene. L’amitié c’est ene très bon kitchose mais bizin faire li acoze Allah Ta’ala. Li ena ene limite ki nou pas gagne droite dépassé. Tanque ça li pas faire nou désobéir nou Rabb, li bon mais quand ça amène pou désobéir nou Rabb, à ce moment-là li ene calamité ki bizin rejeté. Nou Rabb bizin avant tout. Dimoune ki vine pou so Rabb, li conne chaque kitchose so valeur et li conne donne chaque kitchose so vrai dimension. Li pou conne valeur mama papa frère sœur etc. pli bien ki lezot. Et li pou assume so responsabilité pli bien ki n’importe ki sanla. Et c’est ça même banne ki fine conne donne chakene so droit sans manquement, sans excès et sans pénalise kikene. Tout ça-là li trouve dans vine pou Allah Ta’ala. Sinon banne ki fine tourne le dos avec Allah Ta’ala et zotte fine oulé pratique la justice, zotte fine toujours pénalise kikene quelque part pou accorde ene l’autre kitchose ki li pas mérité. Zotte pas fine conne garde l’équilibre. Par contre ti ena ene l’époque cote madame pas ti ena même aukene droit apart ki li ti être considéré comme ene dernier créature. Quand fine donne li, sane fois-là fine prend pou le zot fine donne li et fine donne li plis ki ti bizin donne li. Quand ou donne kikene plis ki so droit, ça li pou nécessite diminué kikene so droit. Donc quand fine donne madame plis ki so droit, aster ou pé bizin lire banne publicité couma "L’homme a les même droits que la femme". Ça pé montré ki zomme fine être lésé de so droit et ça c’est acoze ki madame fine gagne pouvoir plis ki bizin ki finalement fine vine incontrôlable.

Nou vine pou Allah Ta’ala par vive d’après ceki li oulé. Ça façon ki Allah Ta’ala oulé ki insaan bizin vive c’est ça façon ki préconisé par Qour’aan-e-Kareem et fine enseigné par nou bien-aimé Nabi ‎(Sallallaahou A'laihi Wasallam)‎. Quand ene dimoune vine pou Allah Ta’ala, Allah Ta’ala aussi vine pou li. Quand Allah Ta’ala vine pou kikene, li donne li so nécessité et ceki li bizin dans ene façon miracle. Li tire li depi dans tout difficulté ki li été. Li soulage li dans so détresse et dans so banne troubles.

Pli ene kitchose li valeureux, pli li dimane zeffort. Ene simple kitchose dimane ene ti zeffort et ene grand kitchose li dimane ene grand zeffort. Couma ena aussi certaine kitchose ki ou pas pou réussi gagné malgré tout zeffort ki ou faire. A la lumière de ça, nou capave gagne ene l’idée ki quantité difficile li ti bizin été pou gagne Allah Ta’ala. Mais Allah Ta’ala li rempli de bonté et de grâce. Quand ene dimoune vine vers Allah Ta’ala, Allah Ta’ala facilite ça dimoune-là so trajet vers li. Li faire destination-là même enveloppé vine vers li. Selon ene hadice Qudsi, dans ene façon causé, Allah Ta’ala li galoupé li vine vers ene ki marché vine vers li.

[Extrait de Al Jamiat Vol.5 No.6]