Dimoune intelligent

Dimoune intelligent pas capave faire ene transaction cote li mise boucou pou gagne ene tigite. Tanque possible li oulé gagne le maximum profit. Si ou trouve kikene pé acheté ene marchandise lors Rs 100/- pou vane li dans Rs 50/- ou pas hésité pou qualifié li de ene dernier imbécile. Ou pou ena raison croire ki li fine capave sauvé depi quelque part dans Beau-Bassin.

Ou pou étonné pou apprane ki banne imbécile impé dans ça genre-là existé impé partout-partout. Et ena ki li pas dans ça catégorie-là mais parfois li aussi li pas capave résisté à banne influences. Donc parfois li aussi li arrivé commette certaine imbécilité.

Si ou ene musulman, ou bizin conné ki ena ene l’autre monde après ça le monde-là ki appelle aakhirat. Si ou ena imaan ou bizin conné ki ça le monde ki ou pé vive-là li presque pas représente narien ditout divant aakhirat. Donc si ou sincère dans ou imaan, ou pou toujours faire en sorte ki ou aakhirat pas souffert. Si fallait, ou passe ene tigite misère dans ça dounia-là. Mais ou pas détruire ou aakhirat. Combien ena parmi nou ki so comportement dans dounia pé ruine so aakhirat. Combien ena ki pas pé prend compte même ditou si li ena pou alle dans ene l’autre monde après la mort ki appelle aakhirat. Nou dans l’insouciance et nou pé fini nou la vie derrière ça dounia ki nou ena pou resté zisse ene tigite même. Et l’autre coté nou ena pou vive pou tout le temps. Li bien malheureux ki nou ena l’esprit mais nou pas conne servi li. Acoze ça nou pé vive nou la vie couma banne ki pena l’esprit. Si donne bœuf pou gagne ene dizef appelle imbécillité, alors couma ou appelle ça dimoune ki détruire so aakhirat pou gagne dounia ? Nou capave présente mille et ene excuse pou justifié nou mais la vérité pou reste so la vérité. Ene dimoune intelligent pas capave perdi so aakhirat acoze ene tigite jouissance pou ene tigite le temps dans ça dounia-là.

"Mais zotte pé donne la vie dans dounia priorité et pourtant aakhirat li meilleur et éternelle." (V 16-17 S 87)

[Extrait de Al Jamiat Vol.5 No.8]