Meilleur richesse

En réponse ene question ki banne Sahaba-e-Kiraam ti pose Nabi ‎(Sallallaahou A'laihi Wasallam)‎ pou conné ki meilleur richesse, Rassouloullah ‎(Sallallaahou A'laihi Wasallam)‎ ti repone :

1. Ene le cœur ki rempli de reconnaissance pou Allah Ta’ala,
2. Ene la langue ki reste engagé dans zikrullah,
3. Ene bon madame ki aide ou dans ou imaan.

Tout dimoune conne valeur dounia quand même so valeur li limité et éphémère. Acoze ça tout dimoune pé galoupe derrière ça dounia sans ki zotte fine bizin apprane so valeur dans kit institution. Quant à la vrai richesse ki Nabi ‎(Sallallaahou A'laihi Wasallam)‎ fine recommane nou pou acquérir, nou pas pé prend compte. Cela acoze ki ça conviction ferme ki bizin ena pou capave motivé pou faire ene travail, nou pena li. Ça genre de conviction-là li gagné par reste en compagnie de banne personnages pieux pendant ene bon boute le temps et c’est ça même moyen ki fine être adopté de tout le temps. Et ça même moyen ki pli facile, pli efficace et pli sain et sauf. Avec ça moyen-là, ene ti connaissance de Deen aussi li boucou. Mais à défaut de ça, ene l’océan connaissance aussi li capave vine ene facteur déviateur.

[Extrait de Al Jamiat Vol.5 No.8]