Sounnat de Nabi ‎(Sallallaahou A'laihi Wasallam)‎

"Sounnat de Nabi ‎(Sallallaahou A'laihi Wasallam)‎ li couma dire bateau de Hazrat Nooh (‎Alaihis Salaam‎). Celui ki fine rente là-dans, li fine sappé mais celui ki fine ratte li, li fine noyé." (Imam Malik (R))

Le salut de l’humanité li trouve dans attrape sounnat de Nabi ‎(Sallallaahou A'laihi Wasallam)‎. Et ça li bizin dans tous banne domaines de la vie. Sans quoi na pena sapé. Seule solution de tous banne problèmes, c’est suive sounnat de Nabi ‎(Sallallaahou A'laihi Wasallam)‎. La quantité ene dimoune pou éloigné de ça point-là, ça quantité-là même li pou loin de succès. Cherche succès ailleurs li couma dire ou pé voyage dans direction opposé de ou destination.

Qazi Sana-ullah (R) dire :

"Aukene parole pena valeur tanque ki pas mette li en pratique. Et ça li pas acceptable sans ki ena sincérité. Et ça même sincérité li acceptable ki li d’après sounnat de Nabi ‎(Sallallaahou A'laihi Wasallam)‎."

Ene dimoune li capave faire ene ibaadat rempli de sincérité mais ça façon ki li faire li là, li pas d’après sounnat de Nabi ‎(Sallallaahou A'laihi Wasallam)‎. Donc ça pratique-là li pou être rejeté zisse acoze ki li conte Nabi ‎(Sallallaahou A'laihi Wasallam)‎ so tareeqah.

Par exemple faire banne nafil li ene très bonne action ki ena boucou sawaab mais li pas bon si faire li avec jamaat. Donc bizin évite faire namaz couma awwabeen ou bien salaat-ut-tasbeeh avec jamaat ki normalement certaine place zotte pratique li dans banne l’occasion spécifique. D’après banne fouqaha, li makrouh pou faire nafil avec ene jamaat de plis ki 3 ou 4 dimounes.

Par suive sounnat de Nabi ‎(Sallallaahou A'laihi Wasallam)‎, ene dimoune li montré so mouhabbat (l’amour) pou Nabi ‎(Sallallaahou A'laihi Wasallam)‎. Et ça li très essentiel pou imaan. Et c’est suive sounnat même ki indique le vrai l’amour pou Nabi ‎(Sallallaahou A'laihi Wasallam)‎. Selon ene hadice, Nabi ‎(Sallallaahou A'laihi Wasallam)‎ dire :

« Celui ki content mo sounnat, c’est li même ki content moi … »

[Extrait de Al Jamiat Vol.5 No.10]