Manaat ou bien nazar

Mannat ou bien nazar ou bien promesse ki dimoune habitué faire quand zotte oulé gagne kitchose, bizin faire li lors nom Allah Ta’ala seulement. C’est parceki mannat li ene ibaadat et ibaadat pas gagne droit faire pou personne apart Allah Ta’ala.

Couma faire mannat

Dimoune ki li dans kit problème ou bien ki oulé réussi dans kit travail, alors li dire : "O Allah si mo réussi sorti depi dans ça problème-là ou bien si mo réussi dans mo travail mo pou garde 2 roza" ou bien li dire ki "mo pou donne 10 dimounes mangé ou bien mo pou donne Rs 1000/- en charité". Quand dimoune-là réussi, li bizin réalise ceki li fine promette Allah Ta’ala.

Faire nazar li permette mais li déconseillé acoze li paraite ki pé faire chantage avec Allah Ta’ala. Et faudré pas croire ki nazar ena kit pouvoir dans faire nou réussi dans nou but. Personne pas capave force Allah Ta’ala. Li bien grave pou croire ki Allah Ta’ala li obligé faire ceki nou oulé quand nou faire mannat. Acoze ça Nabi ‎(Sallallaahou A'laihi Wasallam)‎ fine dire :

"Pas faire nazar parceki nazar li pas avance narien dans destin. C’est necque ene moyen pou tiré avec ene ki avare." (Boukhari)

Promesse lors nom kikene apart Allah Ta’ala

Li haraam pou faire promesse lors nom kikene apart Allah Ta’ala. Li couma dire pé associé kikene avec Allah Ta’ala. Selon banne livres de fiqh couma Durrul Mukhtaar et Raddul Muhtaar, pas gagne droit faire promesse pou envoye de l’huile ki servi dans faire éclairage lors mazaar (tombe) kit waliyulla. En basant lors ça masla-là, li paraite ki faire mannat pou avoye drap pou mette lors mazaar kikene bizin haraam.

Faire mannat lors nom ‘peer’

Faire mannat lors nom kit burzug ou bien kit sheikh ou bien kit waliyullah li haraam. Et faudré pas croire ki ene waliyullah ena capacité faire kitchose depi dans so qabar. Nourri ene conception pareille li kufr couma ça mentionné clairement dans banne livres de fiqh couma Al-Bahr-ur-Ra’iq, Durrul-Mukhtaar et Raddul-Muhtaar.

[Extrait de Al Jamiat Vol.5 No.10]