Revenue haraam

Ene revenue ki ene dimoune gagné à travers ene moyen ki shariah fine defanne c’est ene revenue haraam. Par exemple la monnaie l’intérêt, la monnaie le course, la monnaie loterie, la monnaie ki fine gagné dans joué dans casino, la monnaie coquin, tous ça là li haraam.

Bizin débarrassé pli vite possible de ene revenue pareille. Si li possible retrace le propriétaire, alors bizin retourne ça à so propriétaire ou bien so zeritier. Et cote impossible, alors bizin dispose ça à banne ki dans difficulté extrême. Par exemple ene dimoune li gravement malade ki dimane être traité à l’extérieure et ki coute bien cher. Mais li pena le moyen. Alors capave aide li depi dans ene fond pareille. Mais faudré pas faire ça avec l’intention pou gagne sawaab. Li bien dangereux et néfaste pou iman ene dimoune ki servi la monnaie haraam dans faire khairaat, la charité et dans faire banne travail charitable avec l’intention pou gagne sawaab.

D’après banne ‘Oulama, ene dimoune ki faire ça avec l’intention de sawaab, li capave vine kaafir. Ça li applique également pou ene dimoune ki faire construire masjid ou madrassah avec so revenue haraam avec l’intention pou gagne sawaab. Li assez serieux. Donc bizin prend compte et essaye comprend li pli bien avec banne ki conné.

Ene dimoune li gagne loterie. Alors li faire khatam dans so la caze et li invite dimoune pou vine mangé cote li. Ça banne dimoune-là bizin prend boucou précaution. Et coumsa même banne ki accepté banne invitation pareille, bizin guette bien. C’est ene question de Deen et Iman ki nou capave perdi li bêtement.

Ki Allah Ta’ala protège nou tous de ça !

[Extrait de Al Jamiat Vol.5 No.11]