Facile et délicieux

Vive dans haraam li attire colère Allah. Coumaniere ene dimoune capave reste en paix si li pé vive ene façon ki attire colère Allah ? Ene dimoune pas bizin ena boucou pou li reste dans bien. Avec ene tigite même li capave ena so bien-être si li pé vive ene façon ki faire Allah plaisir. Vive dans ene façon ki faire Allah Ta’ala plaisir c’est vive dans so l’obéissance par suive le moubaarak sounnat de nou bien-aimé Nabi ‎(Sallallaahou A'laihi Wasallam)‎. Chaque institution content ki dimoune suive tous so banne principes et règlements. Zamais kikene dire ki institution-là pé faire de trop. Au contraire dimoune flatte ça institution-là et zotte dire ki li bien stricte et sévère. Bé ki ena de trop quand nou dire ki bizin obéir Allah Ta’ala tout le temps, partout et dans tout domaine de la vie ? Ki pas bon quand nou dire ki bizin suive Nabi ‎(Sallallaahou A'laihi Wasallam)‎ ?

Ici dimoune ena tendance dire ki li difficile. Mais en réalité, c’est faiblesse dans croyance et conviction ki faire nou trouve ça difficile. Quand dimoune ki trouve so l’intérêt quelque part, li pou trouve ene moyen pou faire li. Mais ene kitchose facile aussi pou paraite difficile si li pas intéressé avec ça.

Longtemps, ene l’époque raze coco ti appelle li la coupe biberon mais ça même kitchose fine vine la mode et dimoune pé faire li avec gloire et plaisir. Si dimoune développe l’amitié pou Allah Ta’ala et admiration pou Nabi ‎(Sallallaahou A'laihi Wasallam)‎, alors tout ceki li pé trouve difficile, non seulement li pou vine facile, mais li pou vine ene qualité délicieux ki li pas pou capave reste sans ça. Dimane ene vrai ahle-sounnah valeur ene sounnat de Nabi ‎(Sallallaahou A'laihi Wasallam)‎. Dimane ene vrai ahl-sounnah ki la joie et la douceur ena dans vive d’après sounnat de nou bien-aimé Nabi ‎(Sallallaahou A'laihi Wasallam)‎. Pou dire ou mais ou pas pou comprend. Ou bizin vive li même pou comprend.

[Extrait de Al Jamiat Vol.5 No.12]