Talaaq en écrit

En principe talaaq li ene kitchose ki donné par dire li avec la bouche. Mais capave donne li aussi en écrit. Ena plusieurs façons écrire talaaq. D’abord capave rédige li en forme ene lettre ki adressé à la personne concerné. Dans ce cas talaaq li prend l’effet quand même li écrire li sans l’intention donne talaaq. Si li fine écrire « Mo fine donne toi talaaq », alors à peine li fine écrire ça, talaaq pou porté. Li pas nécessaire ki so madame recevoir ça lettre-là aussi. Et so iddat aussi pou coummencé apartir ki li fine écrire ça. Mais si li fine écrire « quand to recevoir ça lettre-là, to pou gagne to talaaq », alors faudré madame-là recevoir ça lettre-là pou so talaaq porté.

Dans le cas li fine écrire li dans ene façon informelle c'est-à-dire li pas fine adresse li à la personne concerné ou bien li fine écrire lors tableau, lors muraille ou bien lors ene zarbre ou bien lors di sable avec ene l’écriture ki capave lire et comprend, alors talaaq pou porté si necque fine écrire ça avec l’intention pou donne talaaq.

Attention !

Guette bien si ou pé continué vive avec ou partenaire après ki fine fini ena 3 talaaq. Eski ou conné ki ça appelle vive dans zina ? ou conne très bien ki li pas bon et ou conscient ki banne ki fine conseille ou continué vive, zotte fine dérapé. Mais si malgré ça ou pé continué vive, c’est acoze ene ti l’avantage pou ene tigite jours dans dounia. Eski ou pas trouvé ki ou dans l’erreur ? Ou pé nuire ou aakhirat acoze ene ti plaisir dans dounia. Nabi ‎(Sallallaahou A'laihi Wasallam)‎ so ti zenfant Hazrat Imam Hasaan ‎(Radiyallahou anhou‎)‎ ti donne so madame tous les trois talaaq ene seul coup. Après ça, li fine regretté boucou et li fine dire : « Si mo pas ti tane mo nana dire ki pas gagne droit retourne avec ene madame après ki fine donne li trois talaaq, mo ti pou reprend mo madame. »

[Extrait de Al Jamiat Vol.5 No.12]