No problem !

Pena problème dans dounia ! Si ena problème bé ena so solution aussi. Mais si malgré solution, nou encore dans problème c’est acoze ça voleur ki pé cachiette au fond de nou même. Ça même la cause principale de tout nou problème ki pé ranne nou malheureux.

Ça voleur-là c’est ça l’envi et ça désir ki nou encore gardé dans nou le cœur. Nou pencore prend aukene décision ferme pou débarrassé avec ça. Nou pencore prend décision pou arrête désobéir Allah Ta’ala. Ça même pé faire nou la vie vine misérable et amère.

N’importe ki problème ene dimoune ena, li bizin ena ene solution. Et ça li trouve dans la main Allah Ta’ala. Pou ça même kitchose Nabi ‎(Sallallaahou A'laihi Wasallam)‎ fine recommane nou faire salaat-ul-hajaah c'est-à-dire ene namaz ki ene dimoune faire pou dimane Allah Ta’ala tire li depi dans difficulté ki li été.

Mais li pas sufi ki necque nou faire deux ou quatre rakaat namaz, nou faire wazifah et nou dimane doah. Parceki difficulté ki dimoune gagné, li gagne li acoze kit péché ki li fine capave commette ou bien acoze ene manquement de so part. Donc bizin remédié ça. Alors ceki pli important dans tout ça-là c’est ki nou dévide nou le cœur avec nou Rabb. Nou dimane pardon avec Allah Ta’ala pou tous banne erreurs ki nou fine faire auparavant. Nou arrête désobéir Allah Ta’ala et nou prend l’engagement ferme et solide pou pas désobéir Allah Ta’ala dans l’avenir. C'est-à-dire nou faire tawbah et istighfaar ki pou rapproche nou avec nou Rabb. A ce moment-là nou pou vine sous ene protection spéciale de la part Allah Ta’ala. Dans Qour’aan-e-Kareem, Allah Ta’ala fine promette pou aide banne ki reste dans so l’obéissance.

« … Et celui ki reste dans l’obéissance Allah Ta’ala, li (Allah Ta’ala) faire ene chemin sorti pou li et li accorde li dans ene façon ki li pas attane. Et celui ki garde confiance lors Allah Ta’ala, alors li même sufi pou li. Certainement Allah Ta’ala li fini par atteine so l’objectif. (Mais) Allah Ta’ala fine fixé ene délai pou chaque kitchose » (V 2-3 / S 65)

Mais li pas nécessaire ki problème-là li resoude dans la façon et manière ki nou oulé. C’est Allah Ta’ala li tout seul conné ki bon et ki mauvais pou nou. Combien fois fine arrive nou ki nou regrette certaine kitchose ki nou fine réussi gagné. Nou souhaité ki li ti pou bon si nou pas ti gagne li. Alors Allah Ta’ala li tou seul pou capave resoude nou problème mais dans la façon ki li trouve meilleur pou nou. Mais ene kitchose li garantie ki Allah Ta’ala li pou donne nou la satisfaction et tranquillité morale dans l’état ki li pou garde nou. Et ça même ki important. Allah Ta’ala li ena capacité donne nou, nou bien être lors roche ki ene dimoune peut être pas pé jouir li dans so château lors so dunlop. Poisson li bien dans delo et nou en dehors delo. Allah Ta’ala li tout seul conné ki sanla dans ki l’état pou pli dans bien. Allah Ta’ala li ena capacité donne le bien être du jardin dans ene l’endroit ki rempli ek difé. Coumsa même Allah Ta’ala capave donne la satisfaction du richesse dans l’état de la pauvreté.

[Extrait de Al Jamiat Vol.5 No.13]