الحمد الله

Hamd c’est ene appréciation ki ene kikene mérité lors ene certaine mérite. Mais li bizin ene mérite ki li fine ena li par li même. Li pas fine bizin dépanne lors personne pou ena li. Pena personne ki ena ene mérite pareille. Allah Ta’ala fine faire ene système cote là chaque créature directement ou indirectement li dépanne lors ene l’autre pou vive. Et tout kitchose dépanne lors Allah Ta’ala. Pena doute ki ene dimoune quand li ena ene kitchose de bon dans li, li pas fine capave gagne li sans dépanne lors kikene. Donc personne pas mérite ça kitchose ki appelle Hamd. Ça li réservé uniquement pou Allah Ta’ala parceki li indépendant. Li pas dépanne lors narien dans so grandeur et so gloire. Tout grandeur et tout gloire li appartenir à Allah Ta’ala li tout seul.

Allah Ta’ala li existé de tout le temps. Li pas fine existé par kikene. Li fine crée chaque atome de l’univers et li pas fine bizin personne ene tigite narien ditou aussi dans crée ceki li fine cré. Donc Allah Ta’ala li tout seul mérite Hamd parceki li pas dépanne lors narien dans ena so grandeur et so gloire.

Après avoir comprend et saisi signification de Hamd, ene dimoune ki vraiment intelligent pas capave être orgueilleux et vantard. Parceki c’est ene dimoune imbécile ki ena tendance être vantard avec kitchose ki pas pou li. Si nou guette bien, tout ceki nou ena en général et tout mérite en particulier c’est faveur Allah Ta’ala. Le véritable propriétaire li pas ene l’autre apart Allah Ta’ala. C’est Allah Ta’ala même ki fine mette à nou disposition tout ceki nou ena, pou nou gère ça temporairement. Ene dimoune ki faire vantard acoze ene mérite ki li ena, c’est ene dimoune ki pé ridiculise li même et pé ranne li même bouffon.

Ene matérialiste pou toujours fête so succès par monte lors zépaule so camarade en triomphe. Et après ça, pena narien ki pé attane li apart tombé. Tandis ki ene vrai Deendaar li tombe dans sajdah pou remercié celui ki fine accorde li ça faveur-là. Après ça Allah Ta’ala lève li ene qualité ki personne pas capave jette li. Ki sanla ki capave teigne ene la lampe ki Allah Ta’ala même fine allumé ?

Si necque ene dimoune ti comprend ki veut dire الحمد الله (Alhamdoulillah), alors ça ti boute-là même ti pou plis ki bizin pou guérir li de ça grand maladie ki appelle l’orgueil, vantardise et fierté. Et en même temps ça ti pou amène li pou pas sous-estime so prochain. Li ti pou empêche li ena ene appréciation de soi même.

Ça maladie-là li infecté la société à plusieurs niveau. Tout ça-là capave remédié necque par comprend et agir d’après la formule الحمد الله.

[Extrait de Al Jamiat Vol.5 No.13]