Locataire

To ene locataire. Oui pé bien dire ki to ene locataire quand même dimoune conne toi propriétaire. To capave possède ene tas zaffaire. To capave ena grand grand business et boucou la terre. To dire ki to fine gagne ça par to la sueur. Malgré ki c’est banne faveurs ki to fine gagné avec to Créateur. To ti ene locataire, to ene locataire et to pou reste ene locataire parceki c’est Allah Ta’ala li tout seul ki le vrai propriétaire.

Necque pense ça jour ki to pou enbas la terre, to pou dormi lors la terre et pou couvert toi avec la terre. Pas pou guette la terre-là ki so couleur. Pou ena bébête, pou ena le vers. Mais zotte pou quitte toi dans la terre. C’est ene moment et ene l’heure ki nepli conné ki pou faire. Pena narien apart Allah Ta’ala so faveur ki capave arrête faire nou souffert. Nou pli grand erreur ki tellement nou ingrat et faiseur ki nou nepli rode accepté nou dans l’erreur quand nou déclare être propriétaire. Mais en vérité nou locataire.

O mo Rabb, mo Créateur ! Mo reconnaite par to faveur ki c’est Toi tout seul ki propriétaire. Mo incapable et mo misère. Mo pé attane ki to verse lors moi to faveur. Pardonne-moi mo banne péchés et mo banne erreurs ki mo fine commette sans frayeur et sans pudeur.

[Extrait de Al Jamiat Vol.5 No.13]