La réussite

Personne pas content échoué dans la vie. La réussite c’est ene kitchose ki tout dimoune même apprécié. Et ene dimoune li content réussi dans ene domaine ki li juge li bon pou so l’avenir. Mais dimoune so l’intelligence li limité. Li capave choisir ene kitchose ki plitard li alle conné ki li pas bon. Donc souvent dimoune faire erreur dans faire so choix.

Ene dimoune intelligent li faire so choix avec aide ene ki pli conné. Li pli sure ki li pas pou bizin regrette so choix. Ceki pli efficace ki ça, c’est faire choix avec aide ene ki pas faire erreur jamais. Acoze ça ene musulman li faire so choix à la lumière de Qour’aan-e-Kareem et l’enseignement de Nabi ‎(Sallallaahou A'laihi Wasallam)‎ ki garantir réussite à cent pou cent. Dimoune ki détermine so direction à la lumière de ça deux sources-là, pou toujours réussir dans la vie et dans kitchose ki vraiment valable et bon à tout niveau quand même temporairement, li capave paraite autrement. Celui ki choisir par li même, li pena aukene garanti. Li couma dire ça cerf volant ki fine casse la line ki pas conné cote li pou tombé. So chance si li pas tombe dans précipice, dans piquant ou dans la main banne ki pou déchire-déchire li. C’est voila couma dimoune détruire so l’avenir par tourne so le dos avec commandement Allah Ta’ala et l’enseignement de Nabi ‎(Sallallaahou A'laihi Wasallam)‎. Pena réussite pou ene dimoune pareil. Ceki li prend pou réussite, c’est ene réussite temporaire ki pou converti en echec finalement. Li couma dire ene score ki ou accusé au commencement ki fini par encaisse ene score pli fort dans la fin. Mais sans doute le résultat final pou en faveur celui ki fine suive Deen.

[Extrait de Al Jamiat Vol.5 No.14]