Lors ki sanla qourbaani waajib ?

Question : Lors ki sanla qourbaani waajib ?

Réponse : Qourbaani li waajib lors ene musulman ki li majeur, sain d’esprit et ki ena le moyen pou faire li et ki li pas en voyage.

Question : Ki veut dire ene dimoune ki ena le moyen ?

Réponse : En ceki concerne qourbaani, ene dimoune ki ena le moyen c’est ene dimoune ki ena 200 dirham dans so possession en plis de so banne nécessités de base et so banne dettes. Ça 200 dirham-là li évalué à environ 612 gramme l’argent.

Ene personne ki pena 200 dirham dans so possession mais li ena la valeur de 200 dirham en forme la monnaie liquide aussi appelle ene dimoune ki ena le moyen.

Coumsa même ene dimoune ki ena ça valeur-là en forme marchandise de commerce aussi li reconnaite comme ene dimoune ki ena le moyen.

Similairement ene dimoune ki ena impé l’argent (chandi), impé la monnaie liquide et impé marchandise ki vine dans valeur 200 dirham quand évalué zotte ensam, alors par ça aussi ene dimoune li vine ene dimoune ki ena le moyen.

Question : Ki banne kitchose ki bizin évalué pou conné si ene dimoune bizin faire qourbaani ?

Réponse : En ceki concerne qourbaani, tout banne kitchose, objets ou banne zeffets ki ene dimoune ena apart so banne nécessité de base, bizin évalué pou conné si li ene dimoune ki ena le moyen ou bien non. Par exemple ene dimoune capave ena ene banne meubles ou banne ustensiles ki pas servi et ki li gardé zisse pou faire décoration. Alors ça li pas évalué pou le besoin de zakaat mais bizin évalué li pou le besoin de qourbaani.

Donc tout banne kitchose ki ene dimoune ena en plis de so banne nécessité, bizin prend en considération quand pé évalué le nisaab de qourbaani.

Question : Eski ena qourbaani lors ene dimoune ki endetté ?

Réponse : Si ene dimoune ki ena ene dette ki dépasse ceki li possédé ou bien ene quantité ki pas laisse la valeur de 612 grammes d’argent (Rs. 49,000) dans so possession, alors ça dimoune-là pas obligé faire qourbaani.

Par exemple ene dimoune ena Rs 70,000 et li doit Rs 20,000. Alors li pou bizin faire qourbaani parceki après avoir rembourse so dette, li pou continué ena Rs 50,000 et ça somme-là li plis ki la valeur de 612 grammes l’argent. Par contre si li doit Rs 40,000 là-dans, alors li pas obligé faire qourbaani parceki après remboursement dette, li pou reste ene quantité ki moins ki la valeur de 612 grammes l’argent.

Note: Chiffres ki fine mentionné dans l'exemple de sa l'article la fine être adapté d'après montant nisaab de sa l'année la.

Question : Ene dimoune pé vive comme locataire. Li pena aukene somme d’argent, ni en main ni en banque. Mais li ena ene ti boute terrain ki li ti acheté longtemps ou bien ki li fine gagné en héritage. Eski ça dimoune-là obligé faire qourbaani ?

Réponse : Si ça boute terrain-là li vaut 612 grammes l’argent ou bien plis, alors li bizin faire qourbaani parceki ça li en plis de so banne nécessité de base.

Question : Ki veut dire nécessité de base ?

Réponse : Nécessité de base c’est banne kitchose ki ene dimoune bizin pou servi couma so la caze, banne zeffets ki li ena dans la caze ki li servi, so moyen transport, so linge ki li metté et so banne zoutils travail. C'est-à-dire ça banne zaffaire-là pas pou être évalué. Ene dimoune so taxi ou bien so van ou so camion ki li servi pou travail li comme ene zoutil ki pas pou être évalué. C'est-à-dire ene dimoune li pas obligé faire qourbaani necque acoze ki li ena ene taxi ou ene van ou bien camion parceki ça c’est so zoutil travail. Coumsa même ene dimoune ki ena ene la caze ou ene l’emplacement ki li pé loué pou subvenir à so banne besoins, li pas obligé faire qourbaani. Mais si li pas dépanne lors ça pou so banne besoins, alors ça pou être évalué. Donc li pou bizin faire qourbaani. Par exemple ene dimoune li ena ene l’emplacement ki li pé loué li lors Rs 5000 et li bizin ça même pou so vive, alors ça l’emplacement-là ou ça la caze-là pas pou être évalué en ceki concerne qourbaani. Mais si li ena lezot rente ki sufi pou li vive, alors ça l’emplacement-là li pou ene kitchose en plis. Donc li pou bizin faire qourbaani.

[Extrait de Al Jamiat Vol.5 No.15, Vol.6 No.4 et Vol.7 No.7]