Faire namaz vine Qaza

Couma namaz li obligatoire, coumsa même li obligatoire pou faire li dans so l'heure prescrit. Par exemple namaz fajar bizin faire li avant ki soleil levé. Si par la paresse ene dimoune li reste dormi et faire so namaz fajar après soleil levé, veut dire li fine faire li après l'heure. Faire ene namaz après l'heure appelle faire namaz vine qaza. Et ça li ene péché majeur si fine faire li sans ene raison valable.

Ene médecin dans li pé occupe ene malade grave et urgent fine ratte so namaz dans l'heure. Ça li ene raison valable. Coumsa même dans pé secours ou sauve ene dimoune dans difficulté, fine ratte namaz, alors ça aussi li ene raison valable. Mais mariage, promenade, picnic ou alle dans invitation, li pas banne raisons valable. Faudré pas ratte namaz acoze ça banne raisons-là.

Ene dimoune fine gagne sommeil et li fine reste dormi et li fine ratte so namaz dans l'heure. Ça dimoune-là pena aukene blâme lors li mais si li passe so la nuit dans banne activités inutile et acoze ça li alle dormi tard dans la nuit, alors là li en tort parceki c'est li même ki la cause quand li pas pé capave levé dans l'heure.

[Extrait de Al Jamiat Vol.6 No.1]