Remplace namaz qui fine manqué

Namaz li obligatoire et li ene pilier fondamental de l'Islam. Bizin faire li dans so l'heure prescrit. Namaz ki ene dimoune pas fine réussi faire pou n'importe ki raison dans so l'heure, li bizin remplace li apres. Banne namaz ki ene dimoune fine négligé pendant toute longue la vie, bizin remplacé. Parceki c'est ene dette envers Allah Ta'ala ki bizin être remboursé. Faudré pas découragé. Necque prend courage et commence remplace li doucement doucement. Ou même ou pou trouvé ki dans ene morceau jour, tous fine fini remplacé. Et pas blié Allah Ta'ala so aide pou avec ou ki pou facilite tout.

Coumsa même ou bizin calculé dans tout kitchose. Nou bizin prend l'exemple avec banne ki fine fini allé avant nou. Richesse, beauté, popularité, l'honneur, tous ça-là pou fini quand ou alle enbas la terre. Ça même kitchose ki pou bénéfique ceki ou fine servi li pou faire ou Rabb plaisir. Ça ene ti casse ki ou fine dépensé sans kikene conné, ça ene deux tasbeeh ki ou fine faire dans faire éloge ou Rabb, ça ene deux goute larmes ki ou fine versé pou ou Rabb, c'est ça banne kitchose-là même ki pou servi ou.

Imagine ene coup, si ou faire ou cinq fois namaz dans l'heure, garde ou roza dans le mois de ramadhan, lire ou Qour'aan tous les jours ene tigite et garde ou distance avec tout kitchose ki déplaire ou Rabb, alors ki quantité ça li pou servi ou après !

[Extrait de Al Jamiat Vol.6 No.1]