Negligence dans namaz

Selon Hazrat Abdullah Bin Mas'oud ‎(Radiyallahou anhou‎)‎ le verset 59 de sourah 19 (sourah Mariam), li faire référence à banne ki pas faire zotte namaz dans l'heure ki bizin faire li. Soit zotte faire li bien tard ou bien zotte renvoye ene namaz dans ene lot l'heure namaz ki nou appelle faire namaz qaza. Selon ça verset-là, Allah Ta'ala dire :

"Alors après zotte (banne personnages pieux) fine ena ene l'autre génération ki fine néglige namaz et fine tombe dans divertissement. Alors très bientôt ça banla zotte pou joine 'ghayy'." (V59/S19)

D'après Hazrat Abdullah Bin Mas'oud ‎(Radiyallahou anhou‎)‎  'ghayy' c'est ene vallée ki trouve dans l'enfer ki bien fond et ki rempli avec dipi banne jahannami.

Donc li bien grave si ene dimoune li pas faire namaz dans l'heure ki bizin faire. Quitte namaz et pas faire namaz li pou bizin encore pli grave ki ça. Donc bizin faire namaz et bizin faire li dans so l'heure. Faudré pas faire la paresse.

Selon ene hadice, faire namaz dans so l'heure fine qualifié de meilleur action.

Namaz li ene pilier tellement important et essentiel dans Deen ki dans Qour'aan-e-Kareem fine appelle li Imaan, couma dire Imaan pas capave existé sans namaz. Dans le verset 31 du sourah 30 Allah Ta'ala dire : "... Et établir namaz et pas vine parmi banne moushrik (polythéiste)."

D'après ça verset-là, pas faire namaz li manière ene mousrik. Donc li bien pas bon et li bien vilain ki ene musulman li pas faire namaz. Ena banne punition bien sévère pou banne ki pas faire namaz.

[Extrait de Al Jamiat Vol.6 No.1]