La sincérité

Nou bizin faire tout nou banne Ibaadat pou faire zisse Allah Ta'ala plaisir. Faudré pas nou ena kit l'intérêt personnel là-dans ou bien pou montré lizié dimoune. Donc ene dimoune, c'est so la vie ki pli précieux pou li. Si li donne so la vie aussi, li pas pou mérite gagne narien acote Allah Ta'ala tanque ki li pas faire ça zisse pou faire Allah Ta'ala plaisir.

Faire tout pou faire zisse Allah Ta'ala même plaisir ki appelle ikhlaas ou bien la sincérité. Pena aukene réussite sans ça acote Allah Ta'ala. Ene dimoune sincere li pas intéressé faire dimoune conné ceki li faire comme Ibaadat dans so la caze. Au contraire li faire zeffort pou garde ça cachiette. Ene dimoune sincère li cachiette so banne vertu et so banne bon travail couma ene dimoune faire zeffort pou cachiette so défaut et so péché. Li garde ça ene secret entre li et so Rabb. Ene action avec ene l'état d'esprit pareille li très très valeureux dans lizié Allah Ta'ala. C'est ça même kitchose ki faire le sadaqa de ene poignet tamme dépasse sadaqa de ene montagne l'or. Nou bizin satisfait ki Allah Ta'ala li conné ceki nou pé faire pou li. Tanque possible nou bizin pas faire dimoune conné. Nou bizin contente nou avec récompense ki Allah Ta'ala fine réservé pou nou. Intéresse pou faire dimoune conné li ene indication ki nou pé rode ene l'autre kitchose apart récompense Allah Ta'ala. Et ça li représente ene insulte pou récompense Allah Ta'ala. Li couma dire ene dimoune ki so papa fine donne li par millions mais li pé talle la main pou gagne ene sous ene casse. Ou bien ene dimoune ki fine gagne banne pierres précieuses et li pé encore galoupe derrière banne ferraille rouillé. Ou bien ene dimoune ki ena de l'eau zamzam en so possession mais li pé bavé pou de l'eau sale dans canal. L'absence de sincérité li indique la bassesse de moralité et de caractère. Donc ça li bien grave.

Acoze ça nou bizin pas mélange nou même et nou nafs dans ene kitchose ki nou faire pou Allah Ta'ala. Sinon nou capave dépense tout nou fortune, nou capave donne entier nou la vie dans propage deen ziska finalement nou alle faire coupe nou li cou aussi mais ça pas pou rapporte nou narien si nou pas sincère. Au contraire c'est ene fardeau et ene poids lourd ki nou pou charié lors nou le dos pou alle cote nou Rabb.

Allah Ta'ala pas accepté aukene action apart ene action ki fine faire zisse pou li même et pou faire li même plaisir. (Abou Dawoud / Nassa'i)

[Extrait de Al Jamiat Vol.6 No.2]