Riba

Ou prête ene dimoune Rs 10,000 pou ene certaine période. Mais ou dire li retourne ou Rs 11,000. Ça Rs 1000 en plis ki ou fine exige li pou donne ou c'est riba. Ça même ki nou appelle li l'intérêt. Banne loan ki banne dimoune prend depi la banque c'est purement riba.

Riba li haraam. C'est ene pratique bien bien grave. Pas gagne droit prend ni donné ni gagne droit diboute temoin dans transaction l'intérêt. Ça dimoune ki rédige ene contrat de l'intérêt aussi li coupable. Nabi ‎(Sallallaahou A'laihi Wasallam)‎ fine avoye malédiction lors zotte tous. Riba li ene pratique ki li ruine la vie ene dimoune. Couma ene dimoune ki dans riba capave attane la gaieté ou la joie dans so la vie quand nuit et jour malédiction Allah et so Rasoul ‎(Sallallaahou A'laihi Wasallam)‎ pé tombe lors li ?

Ene dimoune ki vraiment digne pas pou osé rente dans ene transaction ki ena l'intérêt. Parceki d'après hadice, li boucou pli grave ki l'adultère. Li couma dire faire mauvais travail avec so mama. Et d'après hadice, ça c'est so pli tigite gravité. C'est-à-dire riba ena 72 degré de gravité et sanla li so pli tigite. Après ça li ena encore 71 degré pli grave ki ça si so pli tigite li coumsa, bé ceki pli grave ki ça couma pou eté!

Prête la monnaie ene kikene ki dans difficulté li ene action ki ena boucou récompense. Faudré pas réclame aukene kitchose enplis en retour. Au contraire si capave, bizin diminué li ou bien bizin faire li maaf si ou trouve la personne pé gagne difficulté pou remboursé.

Mais pas gagne droit servi ça « action prête la monnaie-là » comme ene moyen pou gagne kit l'avantage. A tel point ki pas gagne droit accepté aukene cadeau ni kit privilège ou service de la part ene dimoune ki ou fine prête li la monnaie. Ça aussi c'est l'intérêt et li haraam. Par exemple ou fine prête ene dimoune la monnaie pou li acheté ene l'auto. Li très normal ki si ou dimane li so l'auto pou ene sorti, li pou prête ou so l'auto. D'après shariah ou pas gagne droit mette li dans ene l'embarras pareil. Ça aussi c'est l'intérêt ni ou gagne droit accepté ene course cadeau de so part. Amoins si ene relation pareil ti déjà existé auparavant.

[Extrait de Al Jamiat Vol.6 No.3]