La jalousie

Tout dimoune même capave éprouve la jalousie plus ou moins. Et ça li incontrôlable. Acoze ça li pas ça mauvais-là. Ceki pas bon c’est quand ene dimoune li agir ou réagir avec la jalousie. Et ça li bien pas bon. Et c’est ça même genre de la jalousie ki ene dimoune li appelé à combattre d’après shariah et c’est ça même ki li dans contrôle ene dimoune. Ene kitchose ki amène ou pou souhaite malheur ou prochain li bizin ene dernier kitchose même. La jalousie li aveuglé ene dimoune à tel point ki li pas trouve narien bon dans ça dimoune ki li ena la jalousie pou li. Li vine couma dire ene li chien ou ene porc ki rente dans ene jardin rempli avec banne fruits et banne joli joli fleurs ki pas intéresse li ditout. Li arrête avec ene impureté ou ene malpropreté ki li trouve là-bas et li patouille là-dans.

Eski ene dimoune capave ene dimoune digne et l’honorable quand li agir avec la jalousie ? C’est ene question ki chakene parmi nou bizin pose nou même. Ena boucou dégâts et du tort dimoune pé faire so prochain acoze ça vilain manière-là.

Shaitaan ti jaloux Hazrat Adam ‎(Alaihis Salaam)‎‎ et li fine faire ene manière pou faire tire li depi dans jannat. Et li ti ena la jalousie pou entier l’humanité. C’est acoze ça li continué mette dimoune dans l’égarement afin ki personne pas rente dans jannat. Premier crime ki fine commette lors la terre c’était par la jalousie quand Qaabil ti touye so frère Habeel. Donc c’est ene inspiration satanique ki fine toujours ronge la société depi le commencement.

La plupart du temps banne querelles belle-mère, belle-fille aussi li déclenché par ça même vilain manière ki nou appelle la jalousie. Et couma nou conné, ça li sépare deux personne ki entre zotte même pena aukene problème. Et finalement c’est banne zenfant ki paye le pot cassé. Acoze ça bizin combatte ça mauvais manière-là à tout niveau avec l’aide banne personne ki ena connaissance et l’expérience dans le domaine.

[Extrait de Al Jamiat Vol.6 No.5]