Poison mielleux

Ene l’ennemi c’est ene kikene ki pas oulé ou bien-être ditout. Tanque capave li pou oulé faire ou souffert à tout niveau. Jamais li pou capave guette ou dans contentement. Ou la joie et ou la gaieté pou indispose li. Acoze ça ene dimoune li pas écoute ceki so l’ennemi dire li. Li reste lors so garde. Li évite so l’ennemi à tout prix. Li pas prend narien avec so l’ennemi. A tel point ki li refuse prend ene kitchose ki capave paraite bon aussi zisse acoze la peur ki li capave pé piège li.

Nou vrai l’ennemi c’est shaitaan. Li fine faire serment pou li mette nou dans l’enfer. Pou atteine so but, li induire dimoune dans toute sorte bêtises. Li tente li pou faire ceki pas bizin. Li ena toujours l’esprit ki li pou capave mette dimoune-là dans l’égarement. Acoze ça li pas découragé. Li pas jette zarme. Li faire zeffort ziska so dernière la gare pou capave faire li commette l’irréparable.

Donc nou bizin conscient ki shaitaan li nou pli grand l’ennemi. Parceki si ene l’ennemi li faire nou souffert dans dounia, shaitaan li joué avec nou deen et nou imaan pou faire nou souffert éternellement.

Acoze ça couma nou pas écoute nou l’ennemi insaan, coumsa même nou bizin conne dire non à shaitaan. Si nou senti nou déshonoré dans suive nou l’ennemi insaan, nou bizin senti nou pli dénigré dans suive shaitaan. Surtout quand nou conné ki shaitaan li bien rusé et parfois li servi vertu pou mette nou dans vice. Dimoune-là croire li pé faire bon travaille mais shaitaan pé vise loin. Par exemple li faire nou croire ki nou pé faire ene très bon travail dans éduque banne madames et banne tifille. Mais doucement doucement ça tournure ki ça prend, nou tout conné ki li bien honteux. Coumsa même li faire nou croire ki nou pé faire ene bon travail dans Deen quand nou fine réussi ouvert la porte masjid pou banne sœurs. Mais d’abord nou bizin comprend ceki nou pé faire li pas compatible avec sounnah de Nabi ‎(Sallallaahou A'laihi Wasallam)‎ parceki nou pé faire campagne et nou pé encourage banne sœurs mais Nabi ‎(Sallallaahou A'laihi Wasallam)‎ jamais fine encourage zotte. Au contraire Nabi ‎(Sallallaahou A'laihi Wasallam)‎ fine faire zotte comprend ki zotte namaz dans ene coin pli retiré dans zotte la caze li boucou pli bon ki zotte faire namaz derrière li dans Masjid-e-Nabawi ! Donc shaitaan li bien rusé et li servi banne points vertueux pou risse so proie dans banne vices ki parfois li irréparable aussi. Toujours bizin méfié shaitaan. C’est banne fouqaha (juristes) ki zordi jour dimoune pas pé écouté même ki capave averti nou de so poison mielleux.

[Extrait de Al Jamiat Vol.6 No.5]