L’autorisation banne madames vine dans masjid

C’est ene vérité ki banne madames ti pé vine masjid dans l’époque Nabi ‎(Sallallaahou A'laihi Wasallam)‎. Et c’est ene facteur ki capave servi comme preuve pou autorise madame vine masjid. Mais bizin conné ki ça l’autorisation-là c’était simplement ene autorisation parceki Nabi ‎(Sallallaahou A'laihi Wasallam)‎ ti toujours préfère banne madames faire zotte namaz dans ene coin pli cachiette dans zotte la caze. Dans ene hadice Nabi ‎(Sallallaahou A'laihi Wasallam)‎ fine dire :

"(خير مساجد النساء قعر بيونهن" (مسند احمد

« Meilleur endroit pou faire namaz pou banne madames li trouve à l’intérieur de zotte la caze. » (Mousnad Ahmad) 

L’autorisation à l’époque Nabi ‎(Sallallaahou A'laihi Wasallam)‎

L’autorisation ki ti existé à l’époque Nabi ‎(Sallallaahou A'laihi Wasallam)‎ ti ene autorisation ki ti attaché avec plusieurs conditions. D’après principe, ene l’autorisation ki attaché avec certaine conditions, li pou reste en vigueur tanque ki ena ça banne conditions-là. Li très normal ki li pou arrête existé si pena ça banne conditions-là. Par exemple li très normal ki ene pension ki ene mineur bénéficié pou arrêté automatiquement quand mineur-là vine majeur. Nabi ‎(Sallallaahou A'laihi Wasallam)‎ fine autorise banne madames sorti pou alle masjid à condition ki zotte l’habillement li pas ene l’habillement attirant. Li bizin ene l’habillement bien simple. Zotte bizin pas mette ene parfum fort. Zotte bizin bien couvert. Zotte pas bizin mêle-pèle avec banne zomme avant rentré ou bien quand zotte sorti depi dans masjid. C’est acoze ça ki Nabi ‎(Sallallaahou A'laihi Wasallam)‎ et banne Sahaba-e-Kiraam ti pé reste attane après avoir termine namaz pou permette banne madames sorti et dispersé.

Dans la pratique nou pou remarqué ki ça banne conditions-là pas pé être respecté. Et ça même ki arrivé tout le temps. Banne dimoune en général zotte ena tendance rappelle l’autorisation de ene certaine pratique mais zotte blié so banne conditions. Acoze ça zotte mette certaine kitchose en pratique sans respecté so banne conditions. Ou bien dans commencement zotte capave bien stricte dans respecté banne conditions. Mais graduellement avec banne influences et contraintes, li affaibli ziska ki li disparaite.

Banne ‘Oulama en temps que responsable dans la société, zotte ena parfaitement raison quand zotte empêche ene pratique pareille quand zotte conné ki dimoune pas pou prend la peine respecté banne conditions.

Autorise ene pratique semblable li couma dire autorise ene zenfant faire ene kitchose ki en principe capave autorisé avec certaine conditions mais avec ene certitude ki zenfant-là pa pou ena la volonté pou respecté. Dans ene circonstance pareil nou pas capave donne tort ene sage ki pou empêche zenfant-là faire ça kitchose-là.

D’ailleurs dimoune pas prend risque pou banne kitchose ki pas ça important-là. Ou capave permette ou prend ene ti risque pou ene grand bénéfice. Mais pas le contraire. Celui ki faire le contraire, li capave ene terrible dans lezot domaine mais islamiquement parlant li pas ene dimoune normal. Shariah li enseigne la sagesse. Li pas capave promouvoir quelque chose contraire à la sagesse.

Le sujet «madame alle masjid» forcé-forcé li capave bénéficié le degré de «ibaahah» c'est-à-dire ene simple autorisation. Et ça aussi avec ene certaine condition. Parceki Nabi ‎(Sallallaahou A'laihi Wasallam)‎ ti pli content ki madame faire namaz dans so la caze dans ene l’endroit ki pli cachiette ki capave.

"ان احب صلاة تصليها المرأة الى الله ان تصلى فى اشد مكان من بيتها ظلمة" (صحيح ابن خزيمة)

"Namaz pli appréciable au près d’Allah Ta’ala ki ene madame faire, c’est ene namaz ki li faire dans ene place pli noir dans so la caze." (Sahih Bin Khuzaimah)

Banne conditions-là ti commence négligé dans l’époque banne Sahaba-e-Kiraam même. Zotte clairvoyance fine amène zotte pou comprend ki si ça condition-là ti prévaloir dans l’époque ki Nabi ‎(Sallallaahou A'laihi Wasallam)‎ ti encore la, alors jamais li ti pou donne banne madames l’autorisation vine masjid. Li pas ene simple constat. C’est le constat de banne Sahaba-e-Kiraam ki fine témoigne la révélation de Qour’aan-e-Kareem. Banne ki fine témoigne législation de Deen et banne ki ti comprend le tempérament de Deen pli bien ki n’importe ki sanla. Si nou mette zotte constat ene coté et l’autre coté ceki banne dimoune pé oulé faire, alors ki nou pou choisir ? Li pou bien bête pou choisir ceki zordi jour dimoune pé vise pou faire.

Donc couma nou capave prend le risque lors la base ene simple l’autorisation quand nou remarqué ki le climat li pas favorable ditout ? Li pé avarié de jour en jour. Et banne conditions pas pé être respecté. Banne precaution ki pé prend li nom de dire.

[Extrait de Al Jamiat Vol.6 No.6]