Ene prescription simple et facile

Li bien facile pou vine proche avec Allah ou bien ceki nou appelle ene Waliyallah. Necque ena pou faire ene seul kitchose. Tout ceki ou envi, ou libre pou faire. Necque ça ene seul kitchose-là même pas bizin faire. Quand ou faire ça ene kitchose-là, ou pas pou bizin faire trop boucou ibaadat. Apart banne ibaadat essentiel, ene tigite ibaadat supplémentaire aussi li pou boucou ! Necque pas faire péché. Ça même assez. Ou pou vine non seulement ene bon dimoune mais pli bon dimoune dans banne dimounes.

Nabi ‎(Sallallaahou A'laihi Wasallam)‎ fine dire : Evite banne kitchose ki interdit, ou pou vine pli grand aabid (ene personne ki faire ibaadat) parmi tous banne dimounes. Voila ene prescription bien facile et bien simple pou approche avec pli grand ki tous, Allah Ta’ala.

D’après ceki Nabi ‎(Sallallaahou A'laihi Wasallam)‎ fine déclaré, ene dimoune li pas vine pli grand aabid par faire boucou ibaadat mais li gagne ca l’honneur-là plitot à travers pas faire péché. Donc pli li évite péché, pli li approché avec Allah Ta’ala. Ça veut dire ki pas faire péché c’est pli grand ibaadat.

Evite faire péché li pas difficile. Mais li dimane volonté et volonté tout dimoune capave développe li par reste avec banne ki ena ça volonté-là et par dimane Allah Ta’ala doah. Quand ene dimoune dimane Allah Ta’ala avec sincérité, Allah Ta’ala accorde li ceki li dimandé. Si ene dimoune dimane Allah Ta’ala la fermeté et stabilité dans Deen, pena raison pou Allah Ta’ala pas accorde li. Mais bizin continué dimandé. Ena dimoune capave tire prétexte ki plusieurs fois li fine essayé mais li pas fine capave reste stable. Mais li bien simple. A chaque fois ki arrive ene contrailleté, necque ena pou faire tawbah et recontinué la route. Ça aussi li ene genre de stabilité ki ena so valeur dans lizié Allah Ta’ala. Mais faudré pas jette zarme.

[Extrait de Al Jamiat Vol.6 No.7]