Le bien être

Ene dimoune so bien être li trouve dans gagne ceki li bizin et dans reste protégé de ceki capave mette li dans difficulté. Acoze ça chaque dimoune li intéresse conne kikene ki capave accorde li ça deux kitchose-là. Ça kikene-là li pas ene l’autre apart Allah Ta’ala.

Tout ceki nou bizin li trouve dans la main Allah Ta’ala et c’est Allah Ta’ala même le vrai Protecteur. Donc ene dimoune so bien être li trouve uniquement dans la main Allah Ta’ala et Allah Ta’ala li accorde ça bien être-là à celui ki reste dans so l’obéissance.

L’obéissance Allah Ta’ala signifié exécute so banne l’ordres et so banne commandements et abstenir de banne kitchose ki li fine interdit et suive le principe de Rasouloullah ‎(Sallallaahou A'laihi Wasallam)‎. Ene personne pareil li gagne aide de coté Allah Ta’ala dans tout banne situation difficile. Et parfois li trouve travail-là faire sans ki li ti atane et dans ene façon miracle.

Allah Ta’ala fine toujours aide so banne serviteurs ki fine reste dans so l’obéissance. Et c’est ene privilège ki pou reste ouvert ziska qiyaamah à tout celui ki pou ena l’obéissance pou Allah Ta’ala. Ene dimoune li bizin toujours reste dans l’obéissance Allah Ta’ala si vraiment li oulé so bien être eternel. Li pas bizin guette so moyen limité. Allah Ta’ala pas bizin moyen pou aide ene dimoune. Narien pas difficile pou Allah Ta’ala. Tout kitchose li dans so capacité. Acoze sa ene dimoune bizin comprend ki narien pas difficile ni facile. Facile c’est ene kitchose ki Allah Ta’ala li aide so serviteur pou faire li quand même en réalité li ene travail bien difficile. Par contre ene travail simple et facile couma batte lizié aussi capave vine impossible si Allah Ta’ala pas aidé. Ena ene douah dans ça sens-là ki dire :

« O Allah ! Pena narien facile apart ceki Toi to fine faire li vine facile ».

Donc nou bizin cherche nou bien être ki trouve uniquement dans être sincère envers nou Rabbb et dans dimane li même tout ceki nou bizin.

[Extrait de Al Jamiat Vol.6 No.7]