L’habit ne fait pas le moine

L’habit ne fait pas le moine ou bien pas guette zozo par so plume etc. c’est banne proverbe ki ena ene certaine vérité mais malheureusement, souvent li mal appliqué. Li capave applique pou ene kikene ki embête dimoune par so tenue et so l’habillement. Mais eski ça signifié ki ene dimoune pas bizin habille li convenablement dans masjid ?

Eski li pas ene prétexte quand nou dire l’habit ne fait pas le moine pou justifié nou tenue indésirable dans masjid ? Jamais ou pou rente dans parlement avec ou jeans et T-shirt. Jamais ou pou marche avec ou pyjama lors la rue. Ou ena ene tenue spéciale quand ou alle lors interview. Et ou pou pousse tout quand ou ena pou alle guette tifi pou marié ! Dans tout ça banne l’occasion-là nou reconnaite l’importance ene tenue convenable. Necque quand dire nou pas mette manche courte, pas mette T-shirt ki pas couvert nou le corps dans ene façon satisfaisante ou bien quand nou dire découvert cheville ki nou rappelle « L’habit ne fait pas le moine » Définitivement c’est ene paravent ki li bon zisse pou camouflé nou mauvaise foi dans ça dounia-là. Dans aakhirat tout pou dehors. Narien pas pou capave cachiette.

[Extrait de Al Jamiat Vol.6 No.8]