Khula

Khula c’est ene demande de talaaq ki vine de la part ene madame. Dans ça demande-là madame-là li propose ene somme à so missié pou ki so missié donne li so talaaq en retour.

Ene fois dans l’époque Rassouloullah ‎(Sallallaahou A'laihi Wasallam)‎, ene madame fine vine cote Nabi ‎(Sallallaahou A'laihi Wasallam)‎ et exprime so dégout pou so missié et fine désir gagne so séparation. Nabi ‎(Sallallaahou A'laihi Wasallam)‎ fine dire ça madame-là retourne so missié ça jardin ki li yi gagné en mahar et fine dimane so missié donne li so talaaq.

Le droit pou donne talaaq li trouve dans main ene missié. Ene madame li pena le droit prend talaaq par li même. Si li trouvé ki li difficile pou vive avec so missié acoze certaine problèmes, alors li gagne droit dimane so liberté à travers khula. Si missié-là d’accord, lerla li capave gagne so khula sinon li pas pou capave gagne ça ni kit comité ou board ou kit panel de ‘Oulama capave accorde li ça parceki khula li abouti et conclure par l’accord mutuel entre les deux parti. Ene madame pas capave gagne ça sans ki missié là d’accord.

Zordi jour nou trouvé ki ça principe-là pé mal appliqué. Ene madame croire ki li capave fini gagne so khula si li pas envie continué ek so mari et si li fini retourne so mari so mahar. Ça li totalement fausse. Bizin comprend ki pena aukene khula sans accord et consentement missié nadame. Ça même principe ki banne ‘Oulama fine comprend depi tout le temps.

Donc pena khula si pena consentement missié. Et si ene madame refaire so l’avenir avec ene fausse khula pareil, alors li pou vive dans zina pou tout le temps. Et endosse ene khula semblable li couma dire donne patente de zina. Li bien grave et extra vilain pou banne organisation ou comité ou panel ki faire ene bêtise pareil. Dimoune ki pas conné-là pé faire même ceki pas bizin mais pas ti à croire ki ça pou être cautionné et encouragé par banne organisation ki pé opéré au nom de l’Islam.

[Extrait de Al Jamiat Vol.6 No.9 & No.10]