Nafs

Ena ene kitchose ki trouve dans insaan ki appelle nafs. Allah Ta’ala fine attache succès chaque insaan dans purifié et nettoye ça nafs-là. Dans langage commun nou capave appelle li par mentalité. Donc d’après Qour’aan, succès insaan li trouve dans dresse so mentalité. Ene dimoune li comporte li bien quand so mentalité bon. Par contre li vine ene nuisance pou la société quand so mentalité gâté. Donc ene société prospère c’est ene société cote banne dimoune ena bon mentalité.

Bon mentalité li amène banne qualité couma la sincérité, l’affection et la volonté pou aide so prochain dans ene dimoune. Par contre ene faille mentalité li développe banne vilain manière couma hypocrisie, la jalousie, rancune, égoïsme etc. dans ene dimoune ki à son tour li crée ene climat de l’insécurité dans la société. Voila dans ki façon ene société vine ene l’enfer couma li capave vine ene paradis aussi. Tout dépanne lors mentalité ki banne dimoune ena.

L’environnent li joué ene rôle assez important dans influence caractère et mentalité ene individu. Ene dimoune li gagne manière et mentalité de ene l’environnent dans ki li vive. C’est acoze ça même ki nou choisir banne institutions ki ena ene bon l’environnent pou nou zenfants. Pli bon façon et le moyen pli efficace pou forme nou caractère et nou mentalité c’est fréquente et reste en contact avec ene personne ki ena ene bon connaissance de Deen, l’expérience de la vie et ki sincère dans so comportement. Dans ene hadice Nabi ‎(Sallallaahou A'laihi Wasallam)‎ fine dire :

« Dimoune ena tendance gagne manière so camarade intime. Alors chaque dimoune bizin guette bien ça dimoune ki li fréquenté-là. »

[Extrait de Al Jamiat Vol.6 No.10]