Dounia et Aakhirat

Pena aukene kitchose ki ene dimoune faire cote li pena pou prend ene certaine risque. Dans tout kitchose même ena risque. Dans marché galoupé ena le risque ki ou capave tombé et casse la main li pied. Dans mangé boire ena le risque ki ou capave touffé. C'est-à-dire ou bizin accepté perdi ene certaine l’avantage pou ou gagne ene lot l’avantage. Ene dimoune intelligent li accepté perdi ene ti l’avantage pou ene grand l’avantage. Coumsa  même li prend ene ti risque pou ene grand l’avantage. Dimoune ki croire seulement dans la vie lors ça dounia-là li sacrifié ene ti l’avantage ou bien li prend ene ti risque pou ene gros profit et ene grand l’avantage. Li pas prend compte la vie dans aakhirat parceki li pas croire là-dans. Par contre ene kikene ki croire dans la vie aakhirat, li considère profit dans aakhirat pli gros profit et pli grand l’avantage. Acoze ça li néglige et abandonne banne kitchose ki paraite ena banne grand l’avantage. Dimoune ki pas conné, zotte pensé ki li ene dimoune bête. Mais li conné ki faire li fine quitte tout ça-là. Li conné ceki li fine quitté, li pas représente narien divant ceki li pé atane pou gagné dans aakhirat. Et li capave pas gagné si li galoupe derrière l’avantage lors dounia. Ça même ki appelle imaan. Banne kaafir dans Makkah ti vine propose Nabi ‎(Sallallaahou A'laihi Wasallam)‎ pou donne li tout ceki li envi gagné zisse pou li quitte invite vers Deen mais Nabi ‎(Sallallaahou A'laihi Wasallam)‎ fine dire : 

« Si zotte mette soleil dans mo la main droite et la lune dans mo la main gauche pou mo abandonne ceki mo pé faire, bé jamais mo pou accepté. »

Acoze ça quand banne Deendaar zotte quitte certaine l’avantage dounia, zotte conné ki aakhirat-là non seulement li bon mais li incomparable dans bon.

[Extrait de Al Jamiat Vol.6 No.10]