Pencore paré !

Quand garçon tifille fine content et la famille tout fine d’accord, alors ki reste pou faire ? Li bien simple. Bizin marié zotte pli vit possible. Ki faire bizin tardé pou marié zotte ? Ena dimoune amène ça thèse ki pencore paré. Ça pencore paré-là li acoze ki la caze pencore paré ou bien garçon ou bien tifi pencore complète zotte l’étude ou bien la famille pé décide pou faire ene grand mariage et pencore faire banne démarche ? Ou bien frère sœur zotte à l’étranger et zot pena congé. Donc pé attane zot congé pou faire mariage. Mais entre-temps garçon tifi pé déjà ena communication entre zotte. Ça communication-là li capave alle ziska bien loin. Tout étape de ça communication-là li qualifié de zina par shariat. Ene étape li pli grave ki so camarade. Tout ça-là passe au su et au vu de toute la famille. Nou capave appelle li ene zina ki commette avec complicité de la famille. Ceki nou comprend ki zot fine paré pou faire haraam à tout niveau. C’est necque pou faire li vine halaal-là même ki zot pencore paré ! Personne pas trouve narien drôle ou anormal. Tout passe divant nou lizié sans le moindre dégout. C’est ene l’état d’esprit ki indique la bassesse et faire nou dessane enba ene niveau cotte insaaniyyat arrête existé.

Ti capave arrête tout ça dégât-là facilement. Li ti pou pli facile en terme le temps, finance et l’énergie. Ti capave faire zot nikah dans la simplicité pou chakene fini vine halaal pou so camarade. Mais dimoune-là li peur et li honté ki dimoune pou dire. Nou bizin conné ceki dimoune envi faire nou faire, li pas d’après le mubaarak principe de Rassouloullah ‎(Sallallaahou A'laihi Wasallam)‎. Allah Ta’ala fine trace ene chemin pou nou. Nou bizin attrape ça chemin-là. Nou bizin pas suive fantaisie banne dimoune ki pas conné ou banne ki déclare pas conné ou bien banne ki nepli ena la volonté pou pratique ceki zotte conné.

« Et Nou fine mette ou lors ene chemin droite de Deen, alors suive li et pas bizin suive banne désir de banne ki pas conné. » (V18/S45)

[Extrait de Al Jamiat Vol.6 No.11]