Bonne manière

Tout banne sujets et domaine ki ene dimoune conné, li fine bizin apprane pou conné. Coumsa même bonne manière aussi li ene kitchose ki bizin apprane pou conné. Personne pas fine vine lors la terre comme connaisseur ou savant. Tout ceki nou vini plitard c’est par apprane li.

« Et Allah fine tire ou depi dans ventre ou mama dans ene l’état ki ou pas ti conne narien … » (V78/S14)

Zordi jour, nou pas gagne ça dans nou la caze. Pena aukene sujet ki enseigné lors bonne manière dans l’école. Et dans la rue nou apprane zouré. Bé coumaniere nou pou gagne bonne manière ? Ça li pli mérité ki nou apprane li comme ene sujet. Nou bizin apprane li à deux niveaux. Dans premier étape, nou apprane ki veut dire bonne manière et mauvais manière. Et dans deuxième étape nou inculqué ceki bon et nou débarrassé depi ceki pas bon. Ça premier étape-là capave apprane li à travers banne livres. Mais pou ça deuxième étape-là, nou bien bizin aide et l’assistance ene personne ki fine gagne formation dans le domaine. Ça même ki nou appelle ene Sheikh ou bien ene guide spirituel. Sans établir ene contact étroite avec ene Sheikh, non seulement li difficile pou inculqué bonne manière mais li pratiquement impossible.

[Extrait de Al Jamiat Vol.6 No.11]