Couma nou capave inculqué banne bon caractère dans nou ?

Question : Couma nou capave inculqué banne bon caractère dans nou ?

Réponse : D’abord bizin conné ki veut dire bon caractère et mauvais caractère afin pou capave débarrassé avec ceki mauvais et développe ceki bon. En principe ene dimoune bizin apprane ça avec ene sheikh Kaamil (guide spirituel compétent). Li pas sufi ki ene dimoune lire dans livre et li essaye développe ça. Développe bon caractère et débarrassé avec ceki mauvais, ça pas vine du jour au lendemain. Dans commencement la personne bizin forcé pou faire li. Graduellement ça li vine facile et automatique. Et finalement li vine ene deuxième nature. Mais bizin persévéré. Avec zeffort et pratique, tout kitchose vine facile. Disons ene dimoune li ena mauvais colère. Alors li bizin pren compte so colère. Li bizin faire zeffort pou mange so coup et pas faire colère. Avec zeffort et persévérance, so fréquence colère pou diminué ziska ki li pou arrête faire li. Dans tout ça-là, c’est le Sheikh ki ena ene rôle très important. Li pou guide la personne et pou montré li banne moyens ki bizin adopté. Li pou assisté li dans chaque étape de so cheminement. Assistance ene Sheikh Kaamil li facilite bane étapes difficiles ki ene dimoune capave joine au cours de so trajet.

[Extrait de Al Jamiat Vol.6 No.11]