Assez tire plan !

Concernant dounia nou pas contente nou avec l’essentiel. Nou cherche toujours l’idéal. Ene simple mangé li sufi pou rempli nou l’estomac mais nou pas satisfait tanque pena so salade, piment ketchup etc. Coumsa même ene simple tissu li sufi pou couvert nou le corps mais nou rode banne tissu de classe et de marque. Dans tout domaine de la vie nou cherche toujours en plis et nou faire l’étalage. Ena des fois l’étalage et banne kitchose supplémentaires li coute nou plis ki l’essentiel mais nous faire li acoze nous content li. Mais concernant Deen nous toujours réticent. Nous toujours essaye rode ene chemin sorti. Nous tire tout qualité plan. Quand dire nou faire tel ou tel kitchose, alors nous toujours ena le prétexte « li sounnat ça », « li pas faraz ça », « le cœur ki compté », « Allah pas guette ou l’habillement » ou bien « Deen ne mesure pas à la longueur de la barbe » etc. Tout ça là c’est prétexte. C’est ene manque de volonté de nous part pou applique Deen. Couma dire Deen c’est ene kitchose ki bizin existé zisse dans le cœur ! Li pena narien à faire avec l’apparence ! Pourtant Shariah fine donne banne directives ki concerne nou l’apparence aussi. Ene dimoune ena parfaitement raison quand li dire ki ene bonne apparence pas nécessairement li ene indication de ene bon l’intérieur. Mais ça aussi li ene vérité ki l’apparence pas capave pas bon si l’intérieur bon.

Quand ou ena admiration pou kikene, sans doute ou pou imite li. Ou pou rode copié li. Banne jeunes conne ça très bien. Zotte accepté mette linge sale, déchiré, habille en désordre, pique zoreille, mette gel dans cheveu, faire cheveu pik pik dans le but pou imite banne ki zotte admiré. Ki qualité Imaan et l’amour pou nou Nabi ‎(Sallallaahou A'laihi Wasallam)‎ nou capave ena ki li pas incite nou pou suive li et pou imite li ! Nou pena admiration pou nou Nabi ‎(Sallallaahou A'laihi Wasallam)‎. Sinon nou pas ti pou tire plan quand arrive tour pou suive li. Assez tire plan. vive ene boute le temps dans compagnie banne ki ena vrai l’amour et admiration pou Nabi ‎(Sallallaahou A'laihi Wasallam)‎. Assez écoute et suive banne ki coze grand grand cozé sans ena sounnat de Nabi ‎(Sallallaahou A'laihi Wasallam)‎. Reste loin avec banne ki dire « Deen ne mesure pas à la longueur de la barbe ». Lerla nou pou gagne vrai mouhabbat et l’amour pou Nabi ‎(Sallallaahou A'laihi Wasallam)‎. Pena Deen ni ena Imaan sans l’amour pou Nabi ‎(Sallallaahou A'laihi Wasallam)‎.

« Par celui ki mo la vie trouve dans so la main, personne parmi ou pas capave être mou’mine (croyant) tanque ki mo pas vine cher à li plis ki so parent et so zenfant et entier l’humanité. » (Boukhari)

[Extrait de Al Jamiat Vol.6 No.12]