Reconnaite ene erreur

Reconnaite ene erreur et faire le nécessaire pou corrige li c’est ene qualité très noble ki pas tout dimoune ena l’honneur possède ça. C’est ene qualité ki necque banne personne digne et noble même ki capave ena ça. Ene dimoune ki rode camouflé so erreur ou bien ki amène ene tas prétexte pou justifié so erreur dans le souci pou sauve la face, c’est ene dimoune indigne parceki ça li vine apartir l’orgueil. Banne dimoune digne et noble fine toujours garde zotte loin de ça vilain manière là. Ene dimoune pas capave être ene dimoune sérieux et sincère si li ena ça manière ki ti ranne shaitaan détestable dans lizié Allah Ta’ala. C’est ene manière ki expose ene dimoune à la colère divine. C’est ene manière ki prive ene dimoune de so bien être réel parceki li pou empêche ene dimoune rente dans jannat quand même si li bien bien tigite aussi. Imagine conséquence banne ki ena ça par tonne dans zotte !

Le monde pé gagne tracas avec cancer. Ça aussi li ene cancer ki débalance entier société et crée désordre et instabilité à tout niveau. Au contraire ça cancer ki nou conne li par l’orgueil li pou suive nou et pou ruine nou la vie après la mort aussi. Eski ene dimoune capave pretanne être propre si so le corps patouillé avec impureté ? ki manière ene dimoune capave déclare sincère, sérieux dans Deen et propre quand li ena ça impureté de l’orgueil rempli dans so le cœur !

L’orgueil li ranne nou indigne et impure. Li très important et même indispensable pou nettoye nou et débarrasse nou de ça impureté-là pou être ene bon dimoune dans le vrai sens du mot. Et ça li pli important pou banne ki faire travail de Da’wah et banne ki coze lors micro. Zotte bizin comprend ki zotte capave faire erreur dans cozé. Zotte capave dire ene kitchose ki pas existé couma zotte capave refuse ene kitchose ki existé.

Ena ene quantité erreur capave glissé dans cozé. Erreur li tout à fait naturel et inévitable. Pas capave dire narien lors-là. Mais ceki pas bon et bien pas bon ki ene dimoune li refuse rétracté quand li arrivé conne so erreur. C’est zisse acoze ki ça pou faire li perdi point divant public. Acoze ça li préfère laisse le public dans noireté et l’égarement et camouflé la vérité. Li bien malheureux ki ene dimoune donne 10 à 15 ans dans so la vie très précieux pou gagne banne degré et diplômes mais là aussi li pas pense pou débarrasse li ek ça impureté-là.

Donc l’orgueil li ene maladie ki fausse ou jugement. C'est-à-dire li faire ou justifié l’injustifiable et li faire ou critique ceki louable dans le souci pou préserve ou propre dignité ou bien pou passe pou bon dans lizié dimoune. Ene vrai musulman li guette l’intérêt de Deen avant so l’intérêt personnel. Li considère la gloire de Deen avant so propre l’honneur. En faisant cela li pas pou déshonore li mais au contraire li pou honore li. C’est Allah Ta’ala ki pou accorde li l’honneur. Pena personne capave déshonore li quand Allah Ta’ala pou honore li. Rassouloullah ‎(Sallallaahou A'laihi Wasallam)‎ fine dire ki celui ki humilié li acoze Allah Ta’ala, alors Allah Ta’ala pou élève li.

[Extrait de Al Jamiat Vol.6 No.12]