Assez ranne ou misérable

Nou faire nou même ditort quand nou faire kikene ditort. Li vrai ki nou pas trouve so conséquence néfaste toute suite mais ça aussi li vrai ki nou ena pou repone pou tout ceki nou faire. Nou pas pou capave cachiette. Nou capave blié ditort et le mal ki nou fine commette mais Allah Ta’ala li conne tout et li pas blié narien.

Si nou faire kikene ditort acoze ene certaine bénéfice, alors nou bizin conné ki bénéfice dans dounia li ene bénéfice ki nou capave jouir zisse ene tigite et ça aussi pou ene tigite le temps. Et acoze ça nou risqué perdi ene bien être réel et eternel. Li bien bête pou perdi ene bien être d’un tel envergure pou ene bénéfice narien ditou. Donc nou ranne nou même misérable par faire ditort à kikene. Li couma dire pé coupe branche ki nou pé assizé lors-là. Eski pas imbécilité sa ?

[Extrait de Al Jamiat Vol.6 No.12]