Garde li chien

Ene dimoune li faire li même ene grand ditort quand li garde li chien zisse pou plaisir acote li. Nou content bénédiction dans nou la caze. Banne farishta ki amène bénédiction dans nou la caze, zotte arrête vini quand ena ene li chien dans ça la caze-là. Ça prive nou de bénédiction divine. Apart ça nou faire ene l’autre défaite en terme récompense. C'est-à-dire la valeur de ene ou deux Qeeraat diminué tous les jours depi dans nou banne récompenses. Ça même ki appelle défaite lors défaite.

A moins si ene dimoune fine garde ene li chien acoze kit nécessité couma la chasse, surveille la cour ou bien surveille troupeau zanimau  etc. Dans ça cas- là li autorisé garde li. Et ça li ene excuse valable. Acoze ça li pas subir aukene sanction en ceki concerne so banne récompense.

Dans ça cas-là eski farishta de bénédiction continué arrête vini ? Selon Allaamah AL-Khattaabi (décédé en 388 H), présence ene li chien ki autorisé gardé dans la caze, li pas empêche farishta de bénédiction vine dans ça la caze-là. Mais d’après Allaamah An-Nawawi présence li chien li empêche banne farishta de bénédiction vine dans la caze quand même dans le cas cote li autorisé garde li aussi parceki Hazrat Jibreel ‎(Alaihis Salaam)‎‎ ti refuse rente dans la caze acote Nabi ‎(Sallallaahou A'laihi Wasallam)‎ acoze ti ena ene ti li chien enba lili. Pourtant Nabi ‎(Sallallaahou A'laihi Wasallam)‎ pas ti conné même ki ena li chien. Et c’était ene raison valable mais ça ti faire Hazrat Jibreel ‎(Alaihis Salaam)‎‎ évite rentré. Donc tanque possible bizin évité. Faudré pas légalise ceki pas permette avec banne prétexte ki pas existé.

[Extrait de Al Jamiat Vol.6 No.13]