Taqwa et Mouttaqui

Taqwa c’est ene qualité ou ene caractère ki faire ene dimoune vive d’après shariat. Li réglé entier so la vie d’après commandement Allah Ta’ala en suivant le mubaarak tareeqah de nou bien aimé Nabi ‎(Sallallaahou A'laihi Wasallam)‎. Celui ki inculqué ça qualité-là dans li lors ene base permanent appelle li muttaqui. Ça même nou appelle li Deendaar ou bien ene dimoune sérieux dans Deen. Ene dimoune dans Deen li ena toujours la chance reste bien dans dounia aussi. Allah Ta’ala dire dans Qour’aan-e-Kareem

« Celui ki faire bon travail, ki li ene missié ou ene madame dans ene l’état ki li ene croyant, alors sans doute Nou pou accorde li ene la vie agréable … » (S16V97)

Quant à banne difficultés ki li capave gagné, c’est banne difficultés ki facile à surmonté et réglé parceki li conné ki la vie lors dounia li pou ene durée limitée. Donc li conné ki banne problèmes aussi c’est banne problèmes temporaire. Le fait ki ene problème li temporaire li déjà ene grand soulagement. En tant ki ene moussalmaane li conné ki tout ceki arrivé, li arrivé par ceki Allah Ta’ala fine décrété. Etre satisfait de ceki Allah Ta’ala fine décrété li obligatoire. C’est ene l’état d’esprit ki faire grand problèmes paraite simple et facile ki capave paraite couma montagnes lors le cœur et l’esprit de banne ki pena li. Ou capave trouve ene dimoune ki pé mange  ene ‘kebaab’ bien pimenté. So lizié nené pe coulé. Ça capave donne l’impression à banne ki pas conné ki li dans la peine. Mais dimoune ki conné li conne très bien ki li pé jouir ene satisfaction extra ordinaire dans so l’intérieur. C'est-à-dire ene difficulté externe li pas nécessairement ene signe de ene souffrance interne. Li capave le contraire aussi surtout pou banne ki fine accède à ene degré bien avancé de taqwa. Taqwa ou bien vive d’après Deen c’est la seule solution de tous banne problèmes. C’est le seul moyen pou attire grâce d’Allah Ta’ala. Pena aukene chemin pou gagne la réussite apart vive d’après Deen ! Taqwa li ouvert la porte de banne bienfaits et li ene protection divine. Allah Ta’ala dire dans Qour’aan-e-Kareem :

« … Et celui ki vive dans l’obéissance Allah, Li (Allah) faire ene chemin sorti pou li et Li (Allah) accorde li so provision dans ene façon ki li pas attane … » (V2-3/ S65)

Donc pena personne ki pli dans bien ki ene muttaqui. Pli ene dimoune li muttaqui, pli li dans bien. Pena sortir de là. Banne Auliya-e-Kiraam dire si banne le roi ti conné ça richesse et ça fortune ki banne Auliya ti possédé dans zotte le cœur, zotte ti pou rode attaque ça banne Auliya Allah-là. C’est ene richesse et ene fortune ki faire dounia avec tous so richesse et so fortune paraite fade et insignifiant. Li vine ene kitchose ki agace ene wali-Allah dans so bien être. Li senti li comme ene fardeau ki li envi débarrassé avec ça le pli vite possible.

Hazrat Aisha ‎(Radiyallahou anhou‎)‎ ti pé recevoir banne gros-gros somme couma 10,000 dirham mais ziska tantôt li pas ti pé reste narien. Li ti pé fini partage tout à tel point ki li pas ti pé ena ene ti casse aussi ki li capave acheté kitchose pou faire iftaar. Ene fois Hazrat Talha Bin Ubaidullah ‎(Radiyallahou anhou‎)‎ fine rente la caze avec ene figure triste et tracassé. So madame fine dimane li ki faire li triste. Li dire dibien ki mo ena li trop boucou et ça pé bouleverse moi. Alors so madame dire li bé partage ceki to ena. Donc li fine partage tout ceki li ti ena à tel point ki li pas fine reste ene dirham aussi. Ça jour-là Hazrat Talha ‎(Radiyallahou anhou‎)‎ ti dépense 400,000 dirham. Coumsa même ene fois Hazrat Talha ‎(Radiyallahou anhou‎)‎ ti vanne ene terrain pou 700,000 dirham. Ene nuit li pas fine dormi acoze ça dibien-là. Arrive gramatin li fine partage tout.

La vrai noblesse et dignité trouve amène la vie dans l’obéissance Allah Ta’ala. Li ranne la personne digne et noble. Pli ene dimoune li sérieux dans Deen, pli li noble et honorable dans lizié Allah Ta’ala. Allah Ta’ala dire dans Qour’aan-e-Kareem :

« … Certainement le plus noble parmi ou auprès d’Allah c’est celui ki pli muttaqui (sérieux dans Deen) … » (V13/S49)

Pena doute vrai izzat et l’honneur li trouve dans vive la vie dans dounia d’après commandement Allah Ta’ala et d’après sounnat de Nabi ‎(Sallallaahou A'laihi Wasallam)‎. Ça c’est le verdict de coté Allah ki fine crée chaque atome de l’univers. Jamais kit la force capave détrône ene ki Allah Ta’ala fine mette couronne lors so la tète. Ene personne honorée par Allah Ta’ala pas capave être déshonorée par aukene force. Marche dans Deen li ranne ene personne l’honorable pou toujours. Vrai l’honneur li trouve dans Deen. Le bien être réel et eternel li trouve dans Deen. Tout ceki bon ki ene dimoune bizin li trouve dans Deen.

[Extrait de Al Jamiat Vol.6 No.13]