Couvert figure quand faire pardah

Question :

Eski ene madame obligé couvert so figure quand li faire pardah ?

Reponse :

Ene madame li bizin couvert entier so le corps y compris so figure. Dans le verset 59 de sourah Ahzaab (33) Allah Ta’ala dire :

« O Nabi (‎(Sallallaahou A'laihi Wasallam)‎) dire ou banne madame, ou banne tifille et banne madame musulman ki zotte couvert zotte avec zotte jilbaab … »

Dans tafseer ça ayat-là, Hazrat Abdullah Bin Abbaas ‎(Radiyallahou anhou‎)‎ dire :

« Allah Ta’ala fine ordonne banne madame musulman ki zotte couvert zotte figure depi la haut zotte la tète avec jilbaab quand zotte ena pou sorti depi dans zotte la caze pou kit nécessité… »

Ça montré ki couvert figure li pas ene coutume mais ene l’ordre Allah Ta’ala. Faudré pas prend ça comme ene fardeau. Par cela ene madame li pas vine ene prisonnière ni ene esclave. Au contraire à l’époque Nabi ‎(Sallallaahou A'laihi Wasallam)‎, banne madames esclaves pas ti pé faire ça genre de pardah-là. C’est necque banne madames libre, digne et noble ki ti pé faire ça genre de pardah-là. Li ti ene signe de chasteté, noblesse, liberté et dignité. Malheureusement dupées par banne islamophobes déguisés en islamologues, banne madame fine considère ça même noblesse comme ene déshonneur et ene signe de arriération et de sous développement. Mais bizin conné ki le vrai succès et la noblesse réelle li trouve dans suive commandement Allah Ta’ala. Et d’après commandement Allah Ta’ala ene madame li bizin couvert so figure.

[Extrait de Al Jamiat Vol.6 No.13]