Pas gagne droit dimandé

Vaut mieux dimandé ki coquin. Ça li bon dans so place mais dimandé aussi li ene déshonneur si faire li sans aukene nécessité. D’après shariah li pas permette pou dimandé si ou ena de quoi ki capave satisfaire ou banne besoin pendant ene jour. Coumsa même li pas permette pou donne ene dimoune pareille quand li pé dimandé parceki li pou ene encouragement pou faire ceki pas permette. Jour qiyamat pou ena banne dimoune ki pou présenté avec zotte visage ki pas pou ena aukene boute la chaire lors-là. C’est banne dimoune ki zotte dimandé sans ki zotte dans le besoin. Coumsa même ene dimoune ki li en bonne santé et ki capave travail pou gagne so la vie, pas gagne droit dimandé. Ni gagne droit donne ene dimoune pareille quand li pé dimandé.

Quant à la question aide ene personne pareille sans ki li dimandé, alors ça li permette et li ene action appréciable si faire li avec l’intention pou allège so fardeau et facilite li pratique so Deen et propage so Deen.

Nou bizin conne différencié entre les deux : entre pas gagne droit dimandé et gagne droit prend quand gagné sans dimandé. Par exemple ene dimoune li misère dans le sens ki li pas bizin tire zakaat ou bien fitra etc. Mais li ena ene quantité dans so possession ki permette li roule so la vie pendant ene jour. Alors ene dimoune pareille pas gagne droit dimandé ni gagne droit donne ene dimoune pareille quand li dimandé. Mais gagne droit donne li sans ki li dimandé et dans ça cas-là li gagne droit prend aussi. A moins si ene dimoune li ena dette ou bien banne dépense apart ou bien banne paiements location, de l’eau, électricité etc. ki li pena le moyen alors li gagne droit approche kikene. Couma li gagne droit approche kit organisation ou société aussi.

Dimandé sans aukene nécessité li vine apartir ceki nou appelle la gourmandise ki bien bien détestable. Li ranne la personne indigne et pena barakat dans ceki li ramassé apartir ça pratique indigne de dimandé-là. Li bon conné ki d’après hadice ene véritable riche c’est ene personne ki fine débarrasse li de ça. Non plus ene personne ki possède boucou.

[Extrait de Al Jamiat Vol.6 No.14]