Le règne de Juhhaal (ignorants)

D'après banne prédiction de Nabi ‎(Sallallaahou A'laihi Wasallam)‎, pou ena ene l'époque avant qiyaamat cotte la connaissance de Deen pou enlevé. La connaissance pou enlevé acoze pas pou ena banne dimoune ki pou ena connaissance de Deen. Zordi jour à force l'ignorance nou capave trouvé ki le public en général nepli ena ene bon jugement pou distingue entre ene bon et ene fausse alim. Acoze ça facilement le public pé gagne embetté avec l'éloquence et l'apparence extérieur et l'emballage ene orateur. Ça cozé geste touye connaissance-là pé appliqué à cent pour cent. Dans ene climat pareil finalement ene dernier jaahil (ignorant) aussi capave passe li pou non seulement ene alim mais pou ene super alim. Banne vrai alim pas pé être considéré et nepli ena valeur. Ene z'enfant li toujours attiré vers ene zouzou en plastic ki ene boute l’or. En matière de Deen, le public pé dessane de plus en plus dans niveau z'enfant. C'est ça ki pé attire zotte vers banne fantaisie au lieu de banne kitchose naturel et réel. Manque de maturité dan Deen pé faire zotte galoupe derrière banne présentation maquillées. Banne paroles de sagesse ki pourtant simple pou comprend et ki bien profitable pena aukene valeur.

C'est ene climat ki favorable à banne jaahil (ignorants) ou bien banne  pseudo-alim ki capave faire zotte même passe pou banne érudits. Zotte pé profite l'occasion pou faire ravage. Kitchose ki pas dans Deen pé être considéré plis ki banne kitchose important dans Deen. Situation fine dégénéré et banne donné fine changé. Zordi jour li pas sufi pou pratique sounnat de Nabi ‎(Sallallaahou A'laihi Wasallam)‎ et banne Sahaba-e-Kiraam pou être Ahle-Sounnah Wal Jama’ah. Ou bizin croire et pratique ene certaine kitchose ki pas dans Deen pour être Ahle Sounnah Wal Jama’ah.Ou capave être ene salafi san suivre salaf. Ki sanla ki salaf si banne Sahaba-e-Kiraam, banne Tabeines et banne Taba-Tabeines pas salaf? Mais d'après tendance général zordi jour li pas sufi pou suivre zotte pou être salafi. Ou pou bizin suivre aveuglement certaine Sheikh pou capave porte l'emblème salafi au lieu suivre banne Sahaba-e-Kiraam. Ça li couma dire être mauricien sans né dans maurice et sans ena passeport maurice ! Bien drôle! Ou bien ou bizin néglige ene série de sounnat de Rassouloullah ‎(Sallallaahou A'laihi Wasallam)‎ et banne Sahaba-e-Kiraam pou être Tawhidi!

Sans doute la vérité-là trouve dans suive strictement le Moubaarak Tareeqah de nou Nabi ‎(Sallallaahou A'laihi Wasallam)‎ et so banne Sahaba-e-Kiraam. Mais attention ! Fodé pas nou essaye comprend li d'après nou l'esprit limité. Nou bizin comprend ça à travers nou banne grand. Ça banne grand-là c'est banne Aimmah-e-Mujtahideen tel que Imam Abou Haniifah (R), Imam Malik (R), Imam Shafi (R), Imam Ahmad Bin Hambal (R).

Mais nou ena mefiance. Nou pas oulé comprend Deen d'après nou banne grand fine comprend. Analyse de ça banne aimmah-là pas dire narien pou nou. Nou pé influencé plitot avec banne ki ena banne titre couma B.A, M.A, Ph.D ou bien DR. à tel point ki nou donne zotte l'importance plis ki ça banne aimmah-là. Li bon conné ki si nou admire et apprécié capacité intellectuelle de ça banne érudits moderne-là, alors ça li bizin ene raison de plus pou ena ene admiration apart et inégale pou banne aimmah. Parceki vraiment dire ça banne érudits zordi jour-là pas représente presque narien ditout divant banne zélèves de banne zélèves aussi de ça banne aimmah-là.

Ene dimoune li bizin ene dernier imbécile même pou gagne l'idée compare li avec ça banne aimmah-là. Li vrai ki bizin ena ene certaine niveau d'intelligence pou capave évalué ene ki vraiment intelligent. Acoze ça banne ‘Oulama de grand calibre couma Allaamah Badruddeen Al-Aini, Allaamah Ibn Hajar Al-Asqalaani, Allaamah An-Nawawi, Allaamah Jalaaluddeen As-Souyouti pas fine trouve aukene chemin pou suivre Deen apart suivre li d'après interprétation ene de ça banne aimmah-là. Zotte fine bizin trouve kitchose dans ça banne ‘Oulama-là pou ki zotte fine suive banne-là. Sinon zotte même zotte ti banne Haafiz de hadice. En sus de ça zotte ti ena l'expertise dans jurisprudence à ene niveau très avancé. Malgré ça zotte fine juge li nécessaire pou cherche secours à ça banne aimmah-là pou capave pratique Deen dans ene façon convenable. C'est ça même ki amène nou pou dire ki pli ou ena connaissance pli ou prudent. Et négligence li vine apartir ignorance. Acoze ça même z'enfant li toujours imprudent, négligent et irresponsable. Quand li hasardé, ça pas veut dire ki li pli vainqueur ki ene grand dimoune. C'est so manque de connaissance et so l'ignorance de banne conséquences grave ki faire li hasardé.

Zordi jour la société li ene ti peu enfantin dans ça genre-là. Zotte na pas hésité pou interprète Qour’aan ou hadice par zotte l’opinion personnel ki rempli avec défection et ki fine contaminé avec formation ki zotte fine gagné ailleurs. Zotte fine formé pou crée dissidence à l'intérieur de l’oummah avec l'impression de reforme par banne slogans ki pena aukene vérité derrière ça. Zotte l'attitude laisse paraite ki zotte pas satisfait avec banne recherches ki nou banne grand fine faire. Ceki capave dire ki soit zotte pé déclare zotte trop conné et pli intelligent ki banne aimmah ou bien zotte manque ça niveau d'intelligence ki permette comprend ça banne aimmah-là. Sans doute la deuxième probabilité paraite pli vrai et pli appliqué. C'est voila couma nou trouve nou dans ene situation cotte fausseur ki lors volant avec banne passagers aveugle. Ki capave attane apart ene conséquence bizin catastrophique.

[Extrait de Al Jamiat Vol.6 No.15]