Vive la vie d'après l'envie

Quand garçon tifi fine content et la famille tout fine d'accord, alors ki reste pou faire? Li bien simple. Bizin marié zotte pli vite possible. Ki faire bizin tarder pou marié zotte? Ena dimoune amène ça thèse-là ki pencore paré. Ça pencore paré-là li acoze ki la caze pencore paré ou bien garçon ou bien tifi pencore complète zotte l'étude ou bien la famille pé décide pou faire ene grand mariage et pencore faire banne démarche. Ou bien frère et sœur zotte à l'étranger et zotte pena congé. Donc pé atane zotte congé pou capave faire mariage. Mais entre-temps garçon et tifi pé déjà ena communication entre zotte. Ça communication-là li capave alle ziska bien loin. Tout étape de ça communication-là li qualifié de zina par shariat. Ene étape li pli grave ki so camarade. Tout ça-là passe au su et au vu de toute la famille. Nou capave appelle li ene zina ki commette avec complicité de la famille. Ceki nou comprend ki zotte fine paré pou faire haraam à tout niveau. C'est necque pou faire li vine halaal-là même ki zotte pencore paré! Personne pas trouve narien drôle ou anormal. Tout passe divant nou lizié sans le moindre dégout. C'est ene l'état d'esprit ki indique la bassesse ki faire nou dessane enba ene niveau cotte insaaniyyat pas existé.

Ti capave arrête tout ça dégât-là facilement. Li ti pou pli facile en terme le temps, finance et l'énergie. Ti capave faire zotte nikah dans simplicité pou chakene fini vine halaal pou so camarade. Mais dimoune-là li peur et li honté ki dimoune pou dire. Nou bizin conné ki ceki dimoune envie faire nou faire, li pas bon parceki li contre la loi Allah Ta’ala. Li pas d’après le mubaarak principe de Rassouloullah ‎(Sallallaahou A'laihi Wasallam)‎. Allah Ta’ala fine trace ene chemin pou nou. Nou bizin attrape ça chemin-là. Nou bizin pas suivre fantaisie banne dimoune ki pas conné ou banne ki déclare pas conné ou bien banne ki nepli ena la volonté pou pratique ceki zotte conné.

« Et Nou fine mette ou lors ene chemin droite de Deen, alors suivre li et pas bizin suivre banne désirs (fantaisies) de banne ki pas conné » (V 18/S45)

[Extrait de Al Jamiat Vol.6 No.15]