Namaz avec jama’at

Dans 24hrs nou ena cinq namaz ki faraz. Faire ça banne namaz-là avec jama’at li sounnat mou’akkadah. C'est-à-dire ene pratique ki Nabi ‎(Sallallaahou A'laihi Wasallam)‎ fine observe li régulièrement ki jamais li fine quitté sans ene raison valable. Donc ene musulman bizin pas quitte li sans ene raison valable. Nabi ‎(Sallallaahou A'laihi Wasallam)‎ fine mette boucou l’emphase lors-là. Li fine même menace pou brule la caze banne dimoune ki pas présent dans masjid pou faire namaz avec jama’at. Ça fine amène certaine ‘Oulama pou dire ki faire banne namaz faraz avec jama’at li waajib. De toute façon prend l’habitude néglige jama’at li ene pratique bien détestable. Li ranne la personne indigne à tel point ki so témoignage pas accepté.

Faire namaz avec jama’at li trouve parmi banne sounan-ul-huda c'est-à-dire banne principes ki garde ene personne lors le droit chemin. D’après Hazrat Abdullah Bin Mas’oud ‎(Radiyallahou anhou‎)‎, ene personne ki manque-manque so namaz avec jama’at li vine bien vulnérable ki finalement jette li dans ene l’égarement extrême. Faudré pas néglige namaz avec jama’at pou ene oui pou ene non.

A noté ki l’importance et vertu faire namaz avec jama’at li applique pou banne missié. Li pas applique pou banne madames. Meilleur place pou banne madames faire namaz c’est à l’intérieur de zotte la caze. Couma li conte sounnat pou ene zomme pas faire namaz avec jama’at dans masjid, coumsa même li conte sounnat pou invite madame vine faire namaz dans masjid.

[Extrait de Al Jamiat Vol.6 No.15]