Jamaat

Deux façons faire namaz

Namaz capave faire tout seul couma capave faire li en groupe. Namaz ki faire tout seul appelle li Salaatul-Mounfarid. Et namaz en groupe appelle namaz avec jamaate.

Faire namaz tout seul

Apart banne namaz couma namaz taraweeh, Salaat-ul-Istisqaa (namaz pou faire doah pou la pluie) et Salaat-ul-Kousouf (namaz à l’occasion de l’éclipse solaire), banne namaz nafil bizin faire tout seul. Pas avec jamaate.

Namaz avec jama’at

Dans 24hrs nou ena cinq namaz ki faraz. Faire ça banne namaz-là avec jama’at li sounnat mou’akkadah. C'est-à-dire ene pratique ki Nabi ‎(Sallallaahou A'laihi Wasallam)‎ fine observe li régulièrement ki jamais li fine quitté sans ene raison valable. Donc ene musulman bizin pas quitte li sans ene raison valable. Nabi ‎(Sallallaahou A'laihi Wasallam)‎ fine mette boucou l’emphase lors-là. Li fine même menace pou brule la caze banne dimoune ki pas présent dans masjid pou faire namaz avec jama’at.

Doucement et fort

Ene imam li bizin lire qiraat à haute voix dans banne namaz fajar, maghrib et esha. Li bizin ene quantité fort ki permette banne muswalli dans premier saff tendé ceki li pé lire. Faudré pas li lire fort plis ki bizin. Li bizin réglé so qiraat d’après la quantité muswalli. Li pas chic pou lire ene coup trop fort si ena bien tigite muswalli ki pas rempli ene saff aussi. Lire ene quantité fort ki fatiguant pou li ou bien ki donne lezot difficulté, li pas ene bon façon.

Traverse divant ene mousswali

Pas gagne droit traverse divant ene dimoune ki pé faire namaz même si fallait attane ene bon boute le temps. Ça li pli bon ki traverse divant li. D’après hadice, si ene dimoune ti conne gravité traverse divant ene mouswalli, li ti pou préfère attane 40 ou 100 banané…

Zenfant dans saff grand dimoune

Li pas bon mette zenfant diboute dans saff banne grand dimoune. Boucou dimoune faire zotte zenfant diboute à coté zotte dans saff grand dimoune. Li pas ene bon pratique. D’après le mouswannaf Ibn Abou Shaibah, Hazrat ‘Oumar ‎(Radiyallahou anhou‎)‎ ti pé tire zenfant depi dans saff. D’après ene hadice ki trouve dans Sounan Abou Dawoud, Rasouloullah ‎(Sallallaahou A'laihi Wasallam)‎ ti pé classe saff banne zenfant derrière saff banne grand dimoune.

Ene seul rakaat dans namaz maghrib avec Imam

Question:

Mo fine gagne ene seul rakaat dans namaz maghrib avec Imam. Couma mo bizin remplace mo namaz?

Réponse:

Quand Imam pé faire deuxième coté salaam, lerla ou dibouté pou remplace banne rakaat ki ou fine manqué. Ou lire sourah Fatihah et ene sourah, ou faire roukou', sajdah et après ça ou assizé ou faire At-Tahiyyaat et ou redibouté. Ça fois-là aussi ou lire Sourah Fatihah et ene sourah. Ou faire roukou', sajdah et ou assize dans At-Tahiyyaat. Ou lire At-Tahiyyaat, Daroud Ibrahim, doua et ou termine ou namaz.

Dresse saff dans namaz

Rassouloullah ‎(Sallallaahou A'laihi Wasallam)‎ fine mette boucou l'emphase lors dresse saff dans namaz. Dresse saff veut dire diboute dans namaz costé-costé et cote-à-cote en sorte ki pas laisse aukene l'espace entre deux mouswalli. Coumsa même ça signifié diboute cote-à-cote en sorte ki personne pas diboute divant derrière afin pou saff reste droite et li pas vine travers.

Syndicate content