Deux façons faire namaz

Namaz capave faire tout seul couma capave faire li en groupe. Namaz ki faire tout seul appelle li Salaatul-Mounfarid. Et namaz en groupe appelle namaz avec jamaate.

Faire namaz tout seul

Apart banne namaz couma namaz taraweeh, Salaat-ul-Istisqaa (namaz pou faire doah pou la pluie) et Salaat-ul-Kousouf (namaz à l’occasion de l’éclipse solaire), banne namaz nafil bizin faire tout seul. Pas avec jamaate.

Rassouloullah ‎(Sallallaahou A'laihi Wasallam)‎‎‎‎ pas ti ena l’habitude faire namaz nafil avec jamaate. Li ti ena l’habitude faire li tout seul. Dans ene ou deux l’occasion, ene ou deux personnes fine suive li dans namaz nafil.

Mais en principe li ti faire li tout seul. Et li fine recommande so Oummat aussi faire namaz nafil tout seul, parceki dans faire li dans ça façon-là, ena pli beaucoup sincérité. Dans ene hadice Rassouloullah ‎(Sallallaahou A'laihi Wasallam)‎‎‎‎ fine dire:

“… Certainement pli bon namaz, c’est ça namaz ki ene dimoune faire dans so la case excepté namaz faraz”. (Boukhari)

Li normal quand li recommandé pou faire namaz nafil dans so la case, li pou faire li tout seul. Pas avec jamaate.

Dans ene l’autre hadice Rassouloullah ‎(Sallallaahou A'laihi Wasallam)‎‎‎‎ fine dire:

"Ça namaz ki ene dimoune faire dans so la case-là, li pli bon ki ça namaz ki li faire dans mo masjid (masjid Nabawi)" (Abou Dawood)

Banne hadices pareil montré ki jamaate c’est ene kikchose ki appliqué particulièrement à banne namaz faraz. Quant à banne namaz ki pas faraz, le principe et la règle à suive, c’est faire li individuellement. Ça principe pou faire namaz nafil individuellement, li pou reste en vigueur et li pou appliqué en général pou tout namaz ki pas faraz. A moins si ena kitchose ki montré ki faire li avec jamaate li pli bon et pli recommandé. A ce moment-là li recommandé ou bien, dans certain cas, li sounnat pou faire li avec jamaate. Couma dans le cas de namaz taraweeh, li sounnat pou faire li avec jamaate.

Faire namaz ki pas faraz avec jamaate, li ene façon pou faire ça namaz-là vine contre le principe établi par Rassouloullah ‎(Sallallaahou A'laihi Wasallam)‎‎‎‎. Faire quelque chose contre le principe établi par Rassouloullah ‎(Sallallaahou A'laihi Wasallam)‎‎‎‎, li ene kikchose très dégoûtant. Couma li pas normale faire namaz faraz tout seul, coumsa même li pas normal faire namaz supplémentaire (namaz ki pas faraz) avec jamaate. Parceki ça li conte structure ki shariat fine établi. Faire kitchose conte structure ki shariat fine établi, li bizin ene kitchose dégoûtant.

Valeur namaz avec jamaate

Rassouloullah ‎(Sallallaahou A'laihi Wasallam)‎‎‎‎ fine dire:

“ Ene namaz en jamaate li depasse ene namaz ki fine faire tout seul par 27 fois” (Boukhari)

Dans ene l’autre hadice, rapporte par Hazrat Abou Said Al-Khoudri ‎(Radiyallahou anhou‎)‎ Rassouloullah ‎(Sallallaahou A'laihi Wasallam)‎‎‎‎ fine dire:

“Namaz en jamaate li depasse namaz ki faire tout seul par 25 fois.” (Boukhari)

De toute façon faire namaz faraz tout seul pas capave être pareil couma faire namaz avec jamaate. Namaz avec jamaate li rapporte récompense 25 à 27 fois plis ki ene namaz ki fine faire tout seul. Selon banne ‘Oulama 25 fois plis li appliqué pou banne namaz faraz ki lire doucement et 27 fois li appliqué pou banne namaz faraz ki lire fort.

L’importance faire namaz faraz avec jamaate

Faire namaz faraz avec jamaate dans masjid li wajib. Li ene péché si pas faire namaz faraz avec jamaate dans masjid. Rassouloullah ‎(Sallallaahou A'laihi Wasallam)‎‎‎‎ ti bien sévère envers banne ki pas ti pé vine dans masjid pou faire namaz jamaate.

Dans ene hadice Rassouloullah ‎(Sallallaahou A'laihi Wasallam)‎‎‎‎ ti fine exprime so l’intention ziska même pou mette du feu dans la caze banne ki pas présent dans masjid pou faire namaz faraz avec jamaate. (Boukhari)

Rassouloullah ‎(Sallallaahou A'laihi Wasallam)‎‎‎‎ li rahmatoul-lil-‘aalameen (ene bénédiction pou entier l’univers). Malgré ça li ti prend ene décision aussi sévère envers banne ki pas faire namaz faraz avec jamaate dans masjid. Ça donne nou ene l’idée de l’importance faire namaz faraz avec jamaate dans masjid.

A la lumière de banne hadices pareil, banne ‘Oulama-e-Deen dire ki li waajib pou faire les cinq namaz faraz avec jamaate dans masjid.

Dans ene hadice Rassouloullah ‎(Sallallaahou A'laihi Wasallam)‎‎‎‎ fine dire:

“ Namaz ene personne ki reste près avec masjid (absolument) pas compté excepté (quand li faire li dans masjid (même).” (Ibn Hibbaan)

Hazrat Abdullah Bin Mas’oud ‎(Radiyallahou anhou‎)‎ fine dire:

“Celui ki ça faire li plaisir ki li joine Allah Ta’ala demain comme ene musulman, alors li bizin observe régulièrement ça cinq namaz-là, dans ene l’endroit acote faire l’appel pou faire ça parceki Allah Ta’ala fine établir ene banne principes pou ou Nabi ki garanti le hidaayat. Et (faire) ça banne namaz-là (avec jamaate dans l’endroit acote faire l’appel pou faire ça) li forme parti dans banne principes ki garanti hidaayat. Et si ou faire namaz dans ou la caze couma sanla qui reste à l’écart de jamaate habitué faire li dans so la caze, alors ou pou abandonne sounnat de ou Nabi. Et si ou abandonne sounnat de ou Nabi, ou pou alle égaré ….” (Mouslim)

Donc, sans ene raison valable, ene dimoune pas gagne droit faire namaz faraz tout seul. En principe li bizin faire li en jamaate dans masjid. Dans faire namaz avec jamaate ena deux kikchoses ki bizin prend en considération: Premièrement bizin faire li avec jamaate et deuxièmement ça jamaate-là li bizin ça jamaate ki faire régulièrement et officiellement dans masjid. C’est dans ça façon-là ki ene personne pou acquitté de so responsabilité de faire namaz avec jamaate dans masjid.

Combien dimoune bizin pou faire jamaate?

Bizin trois personnes au minimum pou capave faire namaz jum’ah, namaz Eid-ul-fitr et namaz Eid-ud-doha. Mais pou les cinq namaz faraz quotidien, bizin au minimum seulement ene personne avec Imaam pou faire Jamaate. Rassouloullah ‎(Sallallaahou A'laihi Wasallam)‎‎‎‎ fine dire:

“Deux (personnes) ou plus ki deux, c’est ene jamaate”. (Ibn Maajah)

C’est ene hadice faible mais ki fine rapporté par plusieurs sources. Ça faire li assez fort pou capave considère li au niveau pratique.

Namaz nafil avec jamaate

Faire namaz nafil avec jamaate li ene pratique ki pas conforme avec le principe établi par Rassouloullah ‎(Sallallaahou A'laihi Wasallam)‎‎‎‎. Couma nou conné, Rassouloullah ‎(Sallallaahou A'laihi Wasallam)‎‎‎‎ so la caze ti attouché avec masjid-e-Nabawi ki ti bizin necque avance rideau et rente dans Masjid. Mais malgré ça, li pas ti pé faire namaz tahajjud dans masjid. D’ailleurs so la caze aussi pas ti spacieux. Ti tellement serré ki Hazrat Aisha ‎(Radiyallahou anhou‎)‎ ti pé bizin avance so li pied pou permette Rassouloullah ‎(Sallallaahou A'laihi Wasallam)‎‎‎‎ faire sajdah. Malgré tous ça banne difficultés et l’inconvéniences-là, Rassouloullah ‎(Sallallaahou A'laihi Wasallam)‎‎‎‎ fine toujours faire tahajjud tout seul dans so la caze. En réponse ene question ki ene Sahabi ti pose Rassouloullah ‎(Sallallaahou A'laihi Wasallam)‎‎‎‎ pou conné acote li pli bon pou faire namaz nafil, Rassouloullah ‎(Sallallaahou A'laihi Wasallam)‎‎‎‎ ti faire li conné ki li pli bon faire li dans la caze. Après ça Rassouloullah ‎(Sallallaahou A'laihi Wasallam)‎‎‎‎ fine dire:

"To pas trouvé qui quantité près mo la caze été avec masjid ? Là-aussi mo préfère faire namaz (nafil) dans la caze à moins si li ene namaz faraz." (Shama-il Tirmizi)

Tout ça-là amène nou pou comprend ki quantité li important pou faire banne namaz supplémentaire tout seul. Donc faire namaz nafil avec jamaate li makrouh Tahreemi. Faire namaz tahajjud et namaz Awwabeen aussi avec jamaate li makrouh Tahreemi.

Exception

Quant à ti jamaate occasionnel de 2 ou 3 personnes sans organisé, et sans invité, alors ça li permette couma ça fine pratiqué  et autorisé par Rassouloullah ‎(Sallallaahou A'laihi Wasallam)‎‎‎‎.

Namaz taraweeh et jamaate

Faire namaz taraweeh avec jamaate li Sounnate Mou’akkadah ‘alal Kifaayah. C’est à dire li sounnat pou accomplir taraweeh dans masjid avec jamaate dans chaque localité. Si ene groupe de personne fine faire li dans masjid, alors chaque individu de sa localité-là pou acquitté de la responsabilité de jamaate. Mais chaque individu bizin absolument faire namaz taraweeh pou acquitté de la responsabilité de Taraweeh. Là-dans ene dimoune pas capave décharge responsabilité ene l’autre. Chaque individu bizin faire li personnellement pou décharge so responsabilité.

Jamaate dans taraweeh li sounnat acoze ki ça ti existé dans l’époque de Rassouloullah ‎(Sallallaahou A'laihi Wasallam)‎‎‎‎. Hazrat Aisha ‎(Radiyallahou anhou‎)‎ rapporté ki :

“Banne dimoune (Sahabah) ti pé faire namaz dans masjid en plusieurs ti jamaate …”.

(Abou Dawood)

Rassouloullah ‎(Sallallaahou A'laihi Wasallam)‎‎‎‎ aussi fine faire namaz taraweeh avec jamaate à trois reprises et après li, banne Sahaba-e-Kiraam fine continué faire li en plusieurs ti groupe ki finalement fine converti en ene seul jamaate par Hazrat ‘Oumar ‎(Radiyallahou anhou‎)‎. Commentant le hadice de Hazrat Aisha ‎(Radiyallahou anhou‎)‎ dans Abou Dawood, Allaamah Al Khattabi dire dans so Ma-‘alimous-sunan:

“Là-dans ena preuve lors l’existence de jamaate dans Qiyaam, pendant le mois de Ramadhan et li casse argument de banne ki prétende ki li ene innovation.” (Ma-‘alim-us-sunan)

Allaamah Bin Taimiyah dire:

“Namaz nafil avec jamaate ena deux qualités:

Ene qualité ki li sounnat pou faire li en jamaate régulier couma namaz Kousouf, namaz Istisqaa et Qiyaam Ramadhaan (Taraweeh)” (Al- fatawah Al-Koubra par Ibn Taimiyah)

Salaat-ul-istisqaa avec jamaate

A l’occasion de Istisqaa (faire doah pou la pluie), ceki pli important et pli essentiel c’est faire doah et istighfaar (repentir). Mais capave faire deux rakaat namaz aussi avec jamaate parceki ena fois Rassouloullah ‎(Sallallaahou A'laihi Wasallam)‎‎‎‎ fine faire li dans ça façon-là aussi. Acoze ça li permette et li moustahab pou faire deux rakaats namaz avec jamaate dans ça l’occasion-là.

Salaatul-Kousouf et Jamaate

Salaat-ul-Kousouf c’est ene namaz ki faire à l’occasion éclipse soleil. Ça namaz-là capave faire li tout seul couma capave faire li avec jamaate, mais li pli bon si faire li avec jamaate.

Salaatul-Khousouf et Jamaate

Salaatul- Khousouf c’est ene namaz ki faire à l’occasion l’éclipse la lune. Rassouloullah ‎(Sallallaahou A'laihi Wasallam)‎‎‎‎ fine faire ça namaz-là. Acoze ça Salaatul Khousouf li sounnat mais faire ça avec jamaate, ça pas fine mentionné aukene part clairement. Acoze ça, li pli bon si faire li tout seul ki faire li avec jamaate.

Salaatul-Jum’ah et Salaatul-Eideine avec Jamaate

Namaz jum’ah bizin faire li absolument avec jamaate. Pas capave faire li tout seul. Bizin faire li avec ene jamaate de minimum trois dimounes ki majeurs. Donc jamaate li ene de banne conditions ki bizin observé pou namaz Jum’ah compté. Coumsa même namaz Eid-ul-Fitr et namaz Eid-ud-doha bizin faire avec jamaate pou li compté.

Namaz Janaza et Jamaate

Namaz janaza c’est ene namaz ki faire pou faire doah en faveur ene musulman quand li mort. Si ene parti musulman faire li, tout banne musulmans pou acquitté de zotte responsabilité. Si personne pas faire li, alors zotte tous pou coupable et responsable acote Allah Ta’ala.

Ça ene parti musulmans-là li capave ene groupe de personnes couma li capave ene seul personne. Ça veut dire ki si ene seul personne fine faire namaz janaza, alors ça li suffit pou décharge la responsabilité et le devoir de tous banne musulmans. Ça montré ki namaz janaza pas nécessaire faire li avec jamaate pou li compté. Sans jamaate aussi li compté mais faire li avec jamaate li pli bon parceki Rassouloullah ‎(Sallallaahou A'laihi Wasallam)‎‎‎‎ fine faire li tout le temps avec jamaate.

D’ailleurs quand faire li avec jamaate, ena pli beaucoup respect, considération et pli beaucoup estime pou le mayyat. 

Namaz avec jamaate dans la caze

Hazrat Abdullah Bin Mas’oud ‎(Radiyallahou anhou‎)‎ dire:

“…… perna personne parmi ou ki perna ene masjid (ene place pou faire namaz) dans so la caze. Si ou faire namaz dans ou la caze et ou abandonne ou banne masjid, ou pou abandonne sounnat de ou Nabi. Et si ou abandonne Sounnat de ou Nabi, ou pou faire travail absolument couma ene kaafir” (Abou Dawood)

Ça montré ki faire namaz avec jamaate dans la caze pas suffit. Faire namaz dans ça façon-là pas faire nou acquitté de nou responsabilité pou faire li dans masjid. Au contraire li ene moyen pou dévide masjid ki bien pas bon. Alors sans ene raison valable, pas gagne droit faire namaz faraz dans la caze au lieu faire li dans masjid. Même si faire li avec jamaate, la aussi li pas suffit. Bizin faire li avec jamaate officiel et régulier dans masjid.

Madame et namaz avec jamaate dans masjid

L’obligation pou faire namaz faraz avec jamaate dans masjid li appliqué pou banne zommes. Quant à banne madames, zotte bizin faire namaz tout seul dans zotte la caze dans ene coin pli retiré ki capave, couma Rassouloullah ‎(Sallallaahou A'laihi Wasallam)‎‎‎‎ fine recommandé pou banne madames. Normalement la recommandation et le choix ki Rassouloullah ‎(Sallallaahou A'laihi Wasallam)‎‎‎‎ fine faire pou nou banne soeurs et nou banne mamans, li boucou pli bon ki ceki nou, nou oulé faire. Rassouloullah ‎(Sallallaahou A'laihi Wasallam)‎‎‎‎ fine dire:

“Pli bon place pou banne madames faire namaz, c’est l’intérieur de zotte la caze”. (Mousnad Ahmad)

Dans ene l’autre hadice Rassouloullah ‎(Sallallaahou A'laihi Wasallam)‎‎‎‎ fine dire :

“… Li (madame) vine pli près avec so Rabb quand li à l’intérieur de so la caze”. (Saheeh Bin Khuzaimah)

Rassouloullah ‎(Sallallaahou A'laihi Wasallam)‎‎‎‎ fine ziska même déclaré ki namaz ene madame à l’intérieur de so la caze, li pli bon ki ça namaz ki li faire dans masjid Nabawi. Donc li dans l’avantage banne madames ki zotte faire namaz dans ene place pli cachiette dans zotte la caze. Là-dans même ena pli boucou bienfait et pli boucou récompense. Et c’est ça même ki pli bon pou zotte.

Ene mise au point

Souvent dimounes objecté, zotte dire ki madame gagne droit alle la foire, alle dans mariage, faire tout qualité l’étalage. Necque dans masjid même ki li pas gagne droit vine faire namaz. Mais ça li pas ene bon raisonnement parceki jamais ene dimoune ki ena connaissance de Deen fine autorise banne madames alle dans ça banne place-là. Au contraire bizin faire banne madames comprend ki si madame pas gagne droit alle masjid pou faire namaz, alors ki quantité li pli empêché pou ene madame alle dans banne l’endroit couma la foire, la plage, mariage etc. acote li pas capave observe le système de pardah ki shariat fine impose.

Si malgré ça, banne madames zotte continué fréquente banne l’endroits pareil, alors ça li pas ene raison pou faire ene l’autre erreur. Parceki ene erreur li reste ene erreur. Li pas ni justifié ni autorise ene l’autre erreur. Au contraire tanque capave et cote capave, bizin diminué nou banne erreurs ki peut-être par ça Allah Ta’ala donne nou tawfeeq et la volonté pou corrige lezot banne erreurs.

Salaatul-witr avec jamaate dans Ramadhaan

Pendant le mois de Ramadhan li pli bon faire namaz witr avec jamaate dans masjid même au lieu garde li pou faire li tout seul dans la dernière partie de la nuit. Parceki Rassouloullah ‎(Sallallaahou A'laihi Wasallam)‎‎‎‎ ti faire ça avec jamaate pendant banne nuits ki li ti faire taraweeh ensemble avec banne Sahaba-e-Kiraam. Après Rassouloullah ‎(Sallallaahou A'laihi Wasallam)‎‎‎‎, banne Sahaba-e-Kiraam dans l’époque Hazrat Umar ‎(Radiyallahou anhou‎)‎, Hazrat Usmaan ‎(Radiyallahou anhou‎)‎ et Hazrat Ali ‎(Radiyallahou anhou‎)‎ fine continué faire salaat-ul-witr avec jamaate dans Ramadhaan. Ça montré ki li meilleur faire li avec jamaate dans Ramadhaan.

Namaz tahajjud avec jamaat

Faire namaz tahajjud avec jamaate dans Ramadhaan ou en dehors avec jamaate li makrouh tahreemi. Parfois parfois si fine faire li avec ene jamaate de 2 ou 3 personnes sans organisé et sans donne invitation, alors dans ça cas-là li permette. Coumsa même faire namaz Awwaabeen après Maghrib dans certaine l’occasion avec jamaate li makrouh tahreemi.

Ki veut dire makrouh tahreemi?

C’est ene degré de l’interdiction ki supporté par ene preuve avec ene li pourcentage de réserve. Makrouh tahreemi li batte prés avec haraam. Acoze ça nou bizin abstenir de ene makrouh tahreemi pareil couma nou abstenir de ene haraam. Makrouh tahreemi li ene ti degré moins ki haraam. Couma haraam li néfaste pou la santé spirituelle, coumsa même makrouh tahreemi aussi li dangereux. Ene-là li pli lente ki so camarade mais tous les deux dangereux. Ene-là li couma dire ene gros du feu et l’autre-là li ene tigite pli moins ki premier-là. Mais tous les deux capave réduire ene grand château en la cendre. Le premier pou faire li dans
ene ti peu plus tigite le temps ki deuxième-là.

Ki veut dire makrouh tanzeehi ?

Makrouh tanzeehi li pli prés avec permissible ki non permissible. Donc faire ene kitchose ki makrouh tanzeehi li pas interdit ni ena kit péché là-dans. Mais li recommandé pou pas faire li afin pou capave reste loin, pas seulement de péché, mais avec soupçon de péché aussi. C’est ene stage avancé de Taqwa.

 ‘O Allah ! Accorde nou ça stage-là. Ameen !

Deuxième jamaate dans masjid

Namaz avec jamaate dans masjid ki shariat fine recommandé, li appliqué pou ça jamaate ki faire régulièrement par banne Mouswalli réguliers ki habite dans les environs de ça masjid-là. Quand ene fois namaz avec jamaate fine fini faire dans ene masjid, alors pas gagne droit faire ene deuxième jamaate là-bas. C’est parceki faire namaz avec jamaate régulier li wajib. Tout travail ki vine ene l’empêchement pou participe dans ça premier jamaate régulier ki wajib-là, li pou automatiquement ene travail ki interdit. Donc c’est dans ce sens ki ene deuxième jamaate ou tout autre jamaate apart le jamaate régulier de masjid, li makrouh pou faire dans masjid.

C’est parceki li ene moyen pou minimize l’importance de jamaate régulier et officiel, et favorise dissension dans mouswalli de ene certaine localité. Et ça li en conflit avec l’esprit de l’unité ki shariat fine visé à travers recommandation pou faire namaz avec jamaate.

“En retournant depi en dehors Madina pou faire namaz, Rassouloullah ‎(Sallallaahou A'laihi Wasallam)‎‎‎‎ fine trouve banne dimounes fine fini termine namaz. Alors li fine rente chez li et fine rassemblé so la famille et fine faire namaz avec zotte”. (Tabraani)

Banne Tabeïnes couma Hazrat Saalim, Imam Az-Zouhri, Yahya Bin Said, Rabi-a et Laith, zotte tous dire:

“Pas bizin faire ene seul namaz deux fois avec jamaate dans ene seul masjid”. (Al Mouqaddamah Al-Koubra)

Imam Shafi (rahmatoullahi ‘alayh) dire:

“Ene groupe de Sahaba-e-Kiraam fine manque namaz avec Rassouloullah ‎(Sallallaahou A'laihi Wasallam)‎‎‎‎. Alors zotte finne faire namaz tout seul. Ceki zotte fine faire, Rassouloullah ‎(Sallallaahou A'laihi Wasallam)‎‎‎‎ ti au courant de ça. Pourtant zotte ti capave faire li avec jamaate”. (Kitaab-Ul-Umm)

Dans ene l’autre place Imaam Shafi (rahmatoullahi ‘alayh) dire:

“Mo désapprouve refaire namaz avec (ene l’autre) jamaate dans masjid parceki ça pas ti été la pratique de Salaf (Sahaba-e-Kiraam et Tabeïnes) ki ti avant nou. Au contraire, ena parmi zotte ki fine même critique ça pratique-là”. (Kitaab-ul-Umm)

Les méfaits de deuxième jamaate

Apres tout nou bizin reconnaite ki banne mouswalli en général zotte sincère dans faire deuxième jamaate. Zotte faire ça sans aukene arrière pensée pou gagne pli boucou sawaab et récompense ki Rassouloullah ‎(Sallallaahou A'laihi Wasallam)‎‎‎‎ fine annoncé à propos faire namaz faraz avec jamaate.

C’est ene l’état d’esprit très louable ki bizin apprécié et ki chaque musulman bizin ena dans li. Mais ça aussi li ene vérité ki ça capave servi ene prétexte pou banne ki pena même l’état d’esprit. Zotte pou faire ça acoze ki peut être zotte pas d’accord avec Imaam par exemple.

Donc dans ene situation pareil ene deuxième jamaate pou ouvert la porte pou ene troisième jamaate ziska ki ça capave converti en ene série des jamaates. Finalement pou ena désordre et l’anarchie dans masjid. Ça pou diminué l’importance ça premier jamaate officiel-là.

Donc acoze ça, ene deuxième jamaate li ene pratique strictement déconseillée afin pou sauvegarde l’importance premier jamaate officiel et pou barre la route à tout banne éléments ki capave bouleverse l’harmonie dans masjid.

Faire namaz sans couvert la tête

Faire namaz sans couvert la tête li pas ene bon façon faire namaz. Coumsa même li pas ene tenue convenable pou faire namaz avec ene T-shirt ou bien avec ene chemise manche courte. Qour’aan-e-Kareem fine servi la formule “Zeenat” au lieu “Libaas” (habit) cote li fine ordonne pou habillé au moment de chaque namaz. Zeenat signifié beauté. Evoquant la raison pou laquelle fine servi “Zeenat” au lieu “Libaas”, banne ‘Oulama-e-Deen fine dire ki Qour’aan-e-Kareem fine servi “Zeenat” au lieu “Libaas” pou montré ki ene mouswalli li bizin non seulement couvert so le corps, mais Ii bizin adopté ene tenue ki convenable au point de vue esthétique. Faudré pas li habillé couma li gagné. Li bizin habillé dans ene façon respectable parceki dans namaz li présente devant Rabb-ul-A’lameen. Pas n’import ki sanla. Donc bizin évite tout tenue ki montré légèreté et négligence dans namaz. Pas couvert la tête, mette T-shirt ou chemise manche courte li pas ene tenue respectable. Donc li makrouh pou faire namaz dans ene tenue pareil.

A ce stade li très important pou conné ki banne juristes fine dire si kikene faire namaz sans couvert la tête de par négligence, alors dans ce cas li makrouh. Mais si kikene pas couvert la tête par mépris pou la pratique de couvert la tête, alors ça c’est ene koufr ça. Bizin faire boucou attention.

Concernant couvert la tête ou pas couvert la tête dans namaz, nou bizin agir avec beaucoup de sagesse. Faudré pas nou mal juge dimoune et surtout nou banne jeunes ki malgré toute sorte de tentations ki ena en dehors, zotte pé trouve ene ti le temps pou vine faire namaz dans masjid. C’est ene kikchose ki mérite être apprécié. Zotte sincère et zotte pé agir d’après ceki zotte conne. Faudré pas mal agir avec zotte acoze ki zotte fine mette T-shirt ou chemise manche courte. Après tout, zotte namaz li compté parceki ceki essentiel c’est couvert depi enbas nombril juska genou. Mais bizin éduque zotte pour capave amène amélioration dans zotte. Ça peut être pou prend ene bon boute le temps mais pou bizin ena ene bon résultat. Même si nou pas gagne l’occasion guette ça bon résultat-là, nou bizin plante zarbre-là pou au moins lezot gagne l’ombrage enbas ça après nou.

Préparé par M.R.Meerun