Loyauté et fidélité

Tout dimoune ki ena l’équilibre mental et moral, li pou apprécié sans doute ça kitchose ki appelle loyauté ou bien fidélité. Mais ça aussi li ene vérité ki bien tigite dans tigite ki oulé inculqué ça dans zotte. Ena des fois zotte capave agir avec loyauté mais sans ene but spirituel derrière ça. Zotte faire li plitot pou banne l’avantage mondaine. Jour ki zotte trouve li ene obstacle pou atteine ene but, alors couma narien ditout zotte capave cédé et agir dans ene façon malhonnête. Donc zotte visé principal c’est bénéfice mondaine. D’après zotte ene kitchose li bon tanque li pas ene obstacle pou ça bénéfice-là. A tel point ene mauvais kitchose aussi li bon si li pas ene obstacle.

Nou guette nou même ene coup. En temps ki musulman, nou reconnaite ki nou fine prend l’engagement avec Allah Ta’ala et nou fine reconnaite Allah Ta’ala comme nou Rabb. C'est-à-dire nou reconnaite ki c’est Allah Ta’ala ki accorde nou tous nou banne besoins. Reconnaissance envers ene ki fine capave ranne ou ene service li ene kitchose tout à fait louable et appréciable ki admiré par tout un chacun. La quantité reconnaissant, loyal et fidèle nou bizin été envers Allah Ta’ala, li pas ene kitchose ki difficile pou comprend. C’est ene kitchose ki ene zanimau impure couma li chien aussi comprend ça. Ou donne li ene boute lezo. Ça même sufi pou ranne li reconnaissant envers ou. Ene li chien li toujours loyal et fidele envers so maitre. Mais nou insaan nou pas fine prouve nou fidélité envers nou Rabb. Nou servi so banne faveurs pou plaire à so banne l’ennemis ! Nou mal dépense richesse ki li fine accorde nou. Nou gaspille le temps et nou l’énergie ki li fine accorde nou dans désobéir li. Eski ou fine déjà trouve ene li chien désobéir so maitre ? Le course-là li entre nou et li chien. Reste à savoir si nou pou capave prouve nou pli performant. Ziska preuve du contraire, nou capave dire ki ene li chien li paraite pli fidele et loyal à so maitre ki insaan en général li été envers so Rabb.

[Extrait de Al Jamiat Vol.7 No.2]