Le loup

Nou content ki tous dimoune conne nou. Nou content ki tous dimoune flatte nou. Nou content grandeur. Nou ena désir pou gagne popularité. C’est ça même ki appelle Houbbul-Jaah ou bien la folie grandeur. D’après diagnostique banne ki dans le domaine, ça signifié ki ena ene le loup dans nou. Ene le loup bien féroce ki capave dévasté nou par détruire nou Deen. Kitchose pli précieux dans ene dimoune c’est so Deen. C’est ene le loup ki pou détruire ça kitchose aussi précieux-là. Ki pou resté avec ene dimoune si so Deen même fine fini détruire. Li détruire tous banne actions ki ene dimoune faire avec boucou zefforts zisse acoze ene ti négligence. Li perdi tous ceki li faire. Pas fini. Li pou entrainé par so figure et pou jette li dans l’enfer ! C’est ene le loup ki pli féroce et pli dangereux ki ene le loup affamé ki largué dans ene troupeau zanimau. Tigite dégât li pou faire !!! Sanla li pli faire dégât avec ene dimoune so Deen.

La folie grandeur li dévasté ene dimoune so Deen plis bien ki ene le loup affamé faire avec ene troupeau zanimo. Li couma dire ou fine passe par ene longue-longue la queue pou finalement arrive cote guichet. Quand présente banne papier, ou pena ene document ki bien bien important et ou pena le temps pou produire ça plitard parceki c’est so date finale et guichet pé fermé. Li pou vraiment chagrinant et regrettant. Li ene problème ki pas capave resoude. Donc c’est la défaite.

Coumsa même ene dimoune pou présenté jour qiyaamat avec banne a’maal ki capave enregistré dans banne dossier volumineux mais ki manque ene papier ou document bien important et indispensable pou ça banne dossier-là accepté. Ça document-là c’est ikhlaas ou sincérité. Ça dimoune-là pas ti faire ça banne bonne actions-là pou faire Allah plaisir. So motif derrière ça c’était pou gagne grandeur et popularité. A so grande déception li pou trouve tous so banne a’maal rejetté et li pou être jeté dans l’enfer.

[Extrait de Al Jamiat Vol.7 No.2]