Shirk déguisé

Tahajjud pendant ene nuit capave rayé acoze ene négligence de moins ki ene minute. Ça arrivé quand ene dimoune li intéresse pou faire dimoune conné ceki li fine faire pendant la nuit. Ça désir-là li émane apartir ene maladie ki appelle « Riya ». C’est ene mauvais poison ça. C’est ene genre de shirk ki hadice qualifié li de shirk khafi. Normalement ene dimoune bizin faire tous ibaadat pou faire Allah Ta’ala plaisir. C’est ça même ki nou appelle ikhlaas ou bien la sincérité. Mais ene dimoune ki ena riya, li envi gagne valeur et l’honneur dans lizié dimoune à travers so banne ibaadat. Ça signifié ki li fine associé lezot avec Allah Ta’ala dans faire ça banne ibaadat là. Acoze ça, fine qualifié ça de shirk. Mais li ene genre déguisé de shirk ki maquillé en forme de ibaadat. Acoze ça appelle li shirk khafi ou bien ene shirk déguisé ou maquillé ou bien ene shirk dissimulé sous voile de ibaadat.

Ene dimoune li capave présent lors tous banne frontières pou faire jihaad et finalement li perdi so la vie dans jihaad. Tout dimoune appelle li ene héros. Zotte salué so courage et so bravoure. Zotte ranne hommage pou so banne sacrifice ki li faire. C’est ça même ti so but et so l’intention. Acoze ça li pou perdi tout ceki li ti faire dans dounia. Et pas fini. Pou traine li par so figure et pou jette ki dans l’enfer. Ene dimoune ki fine dépense tout so richesse et ene aalim ki fine faire travail Deen pou lizié dimoune aussi pou gagne le même traitement.

[Extrait de Al Jamiat Vol.7 No.2]